Ձեր վստահելի աղբյուրը

ՀՀ վերաքննիչ դատարանում,  նախագահությամբ դատավոր Կարեն Բիշարյանի, ընթանում է Նիկոլ  Փաշինյանի դեմ պետական դավաճանության հոդվածով քրեական գործ չհարուցելու որոշման դեմ բողոքի քննությունը։ Նիստին ներկա են 44-օրյա պատերազմում զոհված զինծառայողների հարազատները։ 

Հիշեցնենք, որ 2021 թվականի հունիս ամսին «Հայաստան» խմբակցության պատգամավոր Արծվիկ Մինասյանը և փաստաբան Հակոբ Մարտիրոսյանը հանցագործության մասին հաղորդում էին ներկայացրել՝  պահանջելով քրեական գործ հարուցել Նիկոլ Փաշինյանի կողմից կատարված առերևույթ պետական դավաճանության փաստի առթիվ։ Ներկայացված հանցագործության մասին հաղորդումն առանձին քննության առարկա չի դարձվել։ Բողոքաբերները գտնում են, որ դատախազությունն անգործություն է ցուցաբերել՝ այս հաղորդման հիման վրա Փաշինյանի հանդեպ դավաճանության հատկանիշներով  քրեական գործ չհարուցելով, այլ հաղորդումը բաժանելով երկու մասի և կցելով այլ գործերի։ Առաջին ատյանի դատարանը, սակայն, գտել է, որ դատախազությունը անգործություն չի ցուցաբերել․ այս որոշումն էլ Արծվիկ Մինասյանն ու Հակոբ Մարտիորսյանը  վիճարկել են Վերաքննիչ դատարանում։

Հակոբ Մարտիրոսյանն այսօրվա նիստում ասաց, որ եթե հանցագործության մասին հաղորդում են տվել, լեգիտիմ ակնկալիք ունեն, որ հաղորդման վերաբերյալ քրեական  հետապնդան մարմինը, եթե հանցագործության առիթն ու հիմքերն առկա են, պարտավոր է քրեական գործ հարուցել։

«Առաջին ատյան դատարանում, վերաքննիչ դատարանում ընդլայնված ներկայացեր ենք, թե ինչումն է  կայանում գլխավոր դատախազի  անգործությունը։ Արդյո՞ք մեր հաղորդման հիման վրա օրենքից բխող որոշում է կայացվել»,- հարցադրում արեց փաստաբանը։ 

Նա ասաց, որ սույն բողոքով և սույն հանցագործության մասին  հաղորդումով քննարկվում է  մեկ հարց՝ արդյոք դատախազությունն իրավունք ուներ հանցագործության մասին հաղորդումն կցելու ինչ-որ մի գործի։

Հ.Մարտիրոսյանը դիմելով դատավորին՝ նշեց. «Եթե իրավուքն ուներ, խնդրում եմ, ուրախ կլինեմ, մեղադրողներին հարց ուղղեք՝  վկայակոչել, թե  որ օրենքով եք ուղարկել, որ կցեն այս ինչ քրեական գործին։ Պատասխանատու հայտարարում ենք՝ քրեական դատավարության օրենսգիրքը նման կարգավորում  չունի։ Իսկ եթե չի կարգավորվում, դատախազի կատարած գործողություններն արդեն օրենքով չի կարգավորվում։ Եթե օրենքից բխող գործողություն չէ, ապա ՍԴ համապատասխան որոշման համաձայն  անվիճարկելիորեն, աներկբա համարվում է անգործություն»,- ասաց փաստաբանը։ 

Արծվիկ Մինասյանը շարունակեց. «Որպես ՀՀ քաղաքացի՝ լեգիտիմ ակնկալիք ունեմ, որ իմ երկրի ղեկավարը դավաճան չէ։ Եթե իմ երկրի ղեկավարը կատարել է ենթադրյալ հանցագործություն, առերևույթ դավաճանություն, իմ լեգիտիմ ակնկալիքն է, որպեսզի իրավասու մարմինը, անձը, տվյալ դեպքում քրեական վարույթ իրականացնողն ու քրեական վարույթ իրականացման համար կոնկրետ ցուցում տվող  դատախազությունն ապահովեն, որպեսզի իմ այդ իրավունքի իրացման շրջանակներում երաշխավորեն՝ անձն արդյո՞ք հանդիսանում է ենթադրյալ հանցագործություն կատարած անձ, թե՞ ոչ։

Երկրորդ՝ դատարանն, ըստ քննության,  հաստատի,  արդարադատության կանոններին համաձայն, անձը մեղավո՞ր է այդ հանցագործությունը կատարելու մեջ, թե՞ ոչ։ Որովհետև սա պարզ հանցագործություն չէ։ Մենք խոսում ենք Հայաստանի քաղաքացու հիմնարար իրավունքներից մեկի՝ անվտանգ միջավարում ապրելու մասին»։ 

Հակոբ Մարտիրոսյանն ասաց, որ իր դատախազական պրակտիկայում հազվագյուտ գործերից է, երբ դատախազները տարանջատված են տուժողներից, կարծես թե հակառակ բևեռում լինեն, մինչդեռ  պետք է միասնական լինեն դատավարական կարագավիճակով պայմանավորված։

Այնուհետև նա ընդգծեց. «Բոլոր հանգամանքներն ինձ հիմք են տալիս ենթադրելու, որ առևերույթ գործում են ճնշման տակ, ճիշտ եմ, թե սխալ, ցույց կտա ժամանակը»։

Փաստաբանն ասաց, որ հանցագործության մասին հաղորդման քննարկումը կարգավորվում է 180-րդ հոդվածի կարգով՝ անհապաղ քննարկվի։ 

«Եթե զոհված լիներ իմ տղան կամ ներողություն, հարգարժան դատախազներ, նաև ձեր, այսպես կվարվեի՞ք, այս գործը կկցվեր այլ գործի՞, թե՞ գործ կհարուցվեր»,- ասաց փաստաբանը՝