Ձեր վստահելի աղբյուրը

«Ես ֆիզիկապես չեմ կարողանում դիտել Փաշինյանի ասուլիսները, երբ ալիքները շրջելիս տեսնում եմ նրա դեմքը՝ ցնցումներ եմ ունենում և ինձ համար լրացուցիչ պատիժ է լսելը, թե նա ինչ է դուրս տալիս:

Գիտեմ, թե ինչ պետք է դուրս տա, բնական է, որ նորից պետք է իրեն արդարացնի և շարունակի հանձնել մեր հայրենիքի մասերը, ուրիշ բան նրանից չեմ կարող ակնկալել»,-ասուլիսում հայտարարեց 44-օրյա պատերազմում զոհված Հայկ Մելիքյանի մայրը՝ Նաիրա Մելիքյանը:

Չցանկանալով մեկնաբանել Նիկոլ Փաշինյանի ասուլիսը՝  նա անցավ Գագիկ Ջհանգիրյանի հետ կապված հայտնի ձայնագրությանը:

Նաիրա Մելիքյանը սարսափելի համարեց, որ այսքանից հետո չի հնչել Գագիկ Ջհանգիրյանի հրաժարականի մասին լուրը, իսկ ընդդիմությունը որևէ գործողություն չի կազմակերպել, այն դեպքում, երբ նվազագույնը ԲԴԽ շենքը պետք է շրջափակեին:

«Ընդդիմությունը, որն ստանձնել է իր վրա պարտականություն, տարբեր տեխնոլոգիաների, մասնագետների միջոցով պետք է կարողանա որոշել, թե ինչ ուղղությամբ պետք է շարժվել: Այն պետք է անեին և մեզ՝ որպես զինվորների, պարզապես ասեին՝ այսինչ օրան այստեղ պետք է լինեք, մեզ պետք է ձեր աջակցությունը»,-նկատեց Նաիրա Մելիքյանը և տեղեկացրեց. «Բայց երբ ես անձամբ մոտենում եմ Իշխան Սաղաթելյանին, հարցնում՝ մեզ ասեք, թե ինչ պետք է անենք և նա պատասխանում է՝ գնացեք, ինքնակազմակերպվեք, ես այլևոս այդ մարդուն ոչ ասելիք ունեմ, ոչ ակնկալիք, որովհետև, իմ այս վիճակում, մնում էր, որ մի հատ էլ ինքնակազմակերպվեմ»:

Հերոսի մայրը հայտնեց, որ արդեն մի քանի նիստ է, որ չի գնում դատարան պետական դավաճանության հարցի քննությանը, քանի որ այն արժանապատվության հարց է:

«Ես գտնում եմ, որ  այդ դատական ողջ քաշքշուկները, ստորացումները, մեր այս վիճակին, ցավը մեր վրա, մի հատ էլ ամեն անգամ մեզ տանեն այնտեղ ապտակեն, ամեն անգամ անարգեն մեր երեխաների հիշատակը, այն իմ ուժերից այլևս վեր է»,-ասաց Մելիքյանը և, կասկածելով, որ դեռ արդադարադատությանը հավատացող կա, հայտարարեց. «Քանի դեռ Փաշինյանը և իր թուրքական խունտան բռնազավթած են պահում մեր իշխանությունը, արդարադատության մասով հույս ունենալն անիմաստ է: Մենք մտել ենք փակ շղթայի մեջ, այս մեր հոգեվիճակով վազվզում ենք, գնում ենք՝ այնտեղ դատախազն է մեզ վիրավորում, դատավորն է վիրավորում, գնում ենք քննչական՝ այլ տեղ են պաս տալիս, գնում ենք ԱԱԾ՝ մեկ այլ տեղ: Վազվզում ենք, այնպես է ստացվում, որ մեր խեղճ ու կրակ ողորմելի կյանքը, որը մնացել է մեզ ողբերգությունից հետո, մենք պետք է անցկացնենք դատարանների պատերի տակ: ԱԱԾ-ից, ՀՔԾ-ից մնացել է միայն «ծ» տառը, որը ես վերծանում եմ որպես «ծառա», թուքի ծառա, Նիկոլի ծառա, ում ասես: Ամեն ինչ է,  բացի հայրենիքին ծառայելու երդումը տված մի մարմնից, որը պետք է ապահովեր երկրի և ժողովրդի անվտանգությունը»:

Զոհված զինծառայող Հայկ Մելիքյանի մայրը հայտնեց, որ այդ կառույցներն իրենց նկատմամբ հարգանք չունեն, զուտ բառերի շարան է հնչեցնում:

Նա հարց բարձրացրեց, թե այս օրհասական պահին ո՞ւր է ընդդիմությունը, բացի Երևանում քայլելուց,  ճառեր ասելուց՝ ռազմավարություն, ծրագիր ունե՞ն, թե ոչ:

«Ես եկա եզրակացության, որ այս ամբողջ ընթացքում ընդդիմության միսիան այս մի բուռ մնացած հայ ժողովրդին բացահայտելն և նրան ևս հիասթափեցնելն էր, որպեսզի իմ նմանները գնան տուն և խելագարվեն, անկեղծ եմ ասում»,-հայտարարեց զոհվածի մայրը:

Նրա խոսքով՝ հանրահավաքի հարթակ թույլ չեն տալիս բարձրանալ հրատապ, ըստ էության խոսել ցանկացող մարդկանց, ինչը  Հայաստանում առկա հասարակության բզկտման քաղաքականության շարունակությունն է:

«Լավ, հայրենիքը բերանով եք ասում, բայց հասկանում եք, թե այսօր մենք ինչ ենք կորցնում և, ընդդիմությո՛ւն, ամեն բանից խոսում եք, ինչո՞ւ այդ հարթակից կոչ չեք անում՝  այստեղ հավաքաված այս 10000 նվիրյալներովս գնում ենք Բերձոր, այնտեղ կազմում ենք կենդանի պատ և որևէ ձևով թույլ չենք տալու այնտեղ թուրքի դրոշը ծածանվի: Ինչո՞ւ չեք անում այդ կոչը, խոսում եք մանկավարժի աշխատավարձից, դեսից-դենից, ինչքան հեռահար հարցեր ակ, բացի այն հարցից, որն օրհասական է»,-հայտարարեց Նաիրա Մելիքյանը:

Նա հարց ուղղեց հայ ժողովրդին, որն, ըստ իրեն, այդպես էլ չկարողացավ հագուրդ տալ ռեստորանային ախորժակին՝ նկատելվ, որ բոլորը ռեստորաններում են, ամենուր ռեստորանային կյանքով են ապրում. «Լավ դուք հասկանում եք, թե ինչ է կատարվում, եթե այս տեմպերով շարունակվի թուրքը կմտնի արդեն Երևան, միգուցե՞ արդեն գնաք, թուրքական դրոշակներ պատրաստեք, ձեր պատշգամբներում կապեք, որ լավ դիմավորեք ձե եղբայրներին, միգուցե դա է միայն մնում»:

Մելիքյանը տարակուսեց, որ ֆեյսբուքում խրախճանք էր, երբ հայտարարություն էր տարածվել, թե ժամկետային զինծառայողներն այլև մարտական հերթապահություն չեն անցնելու:

«Ու ես մեկնաբանություն եմ գրել. «Քանի որ էլ երկիր չենք ունենալու, պահելու բան չի լինելու, ուրախացե՛ք, սիրելինե՛ր, ուրախացե՛ք, որ հանձնում են այն հողը, որի վրա դեռ իմ երեխու արյունը չի չորացել, որտեղ դեռ իմ երեխու մասունքները շաղ են տրված, որ ես ընդամենը մի մասունք եմ ստացել և երկու տարի է սպասում եմ, այս նույն հողը տալիս են, դուք ուրախացե՛ք»,-հայտարարեց զոհվածի մայրը և արթնանալու կոչ հղեց նաև սփյուռքին և Արցախի ժողովրդին:

Նաիրա Մելիքյանը շեշտեց, որ նման իրավիճակում այլ բան չի մնում, բացի զոհվածենրի մայրերով մարտական պատրաստություն անցնեն և գնան պաշտպանեն իրենց որդիների պաշտպանած հայրենիքը: