Ձեր վստահելի աղբյուրը

ԱԱԾ պահեստազորի սպաների միություն ՀԿ-ն գրում է․

«Հունիսի 29-ի ձեր ֆեյսբուքյան էջում դուք զետեղել եք գրառում, որտեղ ձեզ բնորոշող ոճով թույլ եք տվել անդրադառնալ ԱԱԾ պահեստազորի սպաների միության համահիմնադիրներից երկուսին:
Պարոն Բաբաջանյան, մեր տպավորությամբ ձեր գործելաոճով դուք դատարկախոս եք, պարզունակ մանր  բանսարկու:

Դատարկախոս եք, քանի որ որերորդ անգամ տարբեր անձանց վերաբերյալ մերկապարանոց հայտարարություններ եք անում, որից հետո ստիպված եք լինում դատարանի որոշումով հրապարակավ ներողություն խնդրել, վնասը փոխհատուցել: Հիշեցնենք միայն վերջինը` Արթուր Վանեցյանին առնչվող դեպքը, երբ դուք զրպարտել էիք նրան, ինչի համար էլ ձեր վերը նշված գրառման մեջ ճարպկորեն շրջանցում եք նրա անձը (http://www.datalex.am/?app=AppCaseSearch):

Այդ են վկայում նաև ԱԱԾ վերաբերյալ ձեր մակերեսային պատկերացումները: Դրանք այնքան անհեթեթ են, որ նույնիսկ չգիտեք, որ ռազմական հակահետախուզության ուղղությամբ կատարվող աշխատանքների համար տարիներ շարունակ պատասխանատու են եղել նաև նույն այն անձինք, ովքեր այսօր արդեն ղեկավարում են ԱԱԾ-ն: Եթե դուք որևէ խնդիր եք տեսնում այդ ուղղությամբ նախկինում իրականացված աշխատանքների արդյունավետության մեջ, ապա ձեր դժգոհությունները, պահանջներն ուղղեք հենց նրանց, եթե, իհարկե, նման համարձակություն կունենաք:

Պայմաններ մի ստեղծեք, որ հարկադրված լինեք մեզանից էլ հրապարակավ ներողություն խնդրել:
Ինչպես վերն ասել ենք, դուք, ըստ էության, նաև մանր բանսարկու եք: Ձեր անձի շուրջ էժանագին հետաքրքրություն, աժիոտաժ ստեղծելու նպատակով  մշտապես փորձել եք ձևավորել իբր հալածյալի կերպար:  Նախկին պաշտոնյաների, ազդեցիկ մարդկանց միջնորդությամբ պարբերաբար խնդրել եք պաշտպանել ձեզ իբր սպառնացող վտանգներից, երևակայական հետապնդումներից, որոնց հեղինակն իրականում եղել եք հենց դուք և նույնիսկ երախտապարտ եք եղել դրանց դիմաց: Այս լույսի ներքո իրավապահ մարմիններից, հատկապես մեր գործընկերներից պահանջում  ենք խորը քննություն իրականացնել և ստուգել ձեզ պատկանող մեքենայի վրա կրակելու, սպանության փորձի իմիտացիա անելու վարկածը, դրա իրական դրդապատճառը, թե ում եք ցանկացել մեղադրել:

Պարոն Բաբաջանյան, դուք չարացած ու դժբախտ մարդ եք` հաշվի առնելով այն ճանապարհը, որով անցել եք, ապրելակերպը, որը վարում եք: Դրանք են վկայում այն, որ դուք անգամ ստիպված եք եղել ձեր անձը փրկելու համար Ձեր մոր վրա ցուցմունք տալ, բանակից խուսափել, ենթարկվել քրեական պատասխանատվության, անընդհատ արդարացումներ փնտրել ձեր վարած կենցաղի և կապերի հետ կապված:  Փորձեք ինքնամխիթարվել, դուք գիտե'ք, թե ինչպես`նորանոր  «հաճույքներ» փնտրելով ձեր սիրած կայքերում:

Ի դեպ` մենք երբեք ռուսամետ դիրքերից չենք հանդես եկել, ձգտել ենք ներկայացնել  բալանսավորված, օբյեկտիվ ճշմարտությունը` հստակ իմանալով ու բարձր գնահատելով թե Արևմուտքի և թե Ռուսաստանի անուրանալի դերը Հայաստանի ու ողջ տարածաշրջանի համար:

Մեր հստակ դիրքորոշումը մեկն է` Հայաստանում չպետք է հաստատվի բռնապետություն, ղեկավարը չպետք է վերածվի կուռքի: Մենք մեր աշխատանքով փորձել ենք նպաստել Հայրենիք-Սփյուռք-Արցախ եռամիասնության ամրապնդմանը, որի կարևորությունը լավ կլիներ, որ դուք էլ գիտակցեք»: