Ձեր վստահելի աղբյուրը

 ՍԴ աշխատակազմի նախկին ղեկավար Էդգար Ղազարյանը մամուլի ասուլիսի շրջանակում անդրադառնալով այսօր կայացած  ԱԺ արտահերթ նիստին, երբ 66 «կողմ» և 0 «դեմ» ձայների հարաբերակցությամբ դադարեցվեց ԱԺ փոխնախագահ Իշխան Սաղաթելյանի և Վահե Հակոբյանի լիազորությունները, նշեց, որ քվեարկությանը մասնակցել են միայն  ՔՊ պատգամավորները և  այդ խմբակցությունն ԱԺ-ի անունից  է որոշում է կայացրել ։ Սա, ըստ Ղազարյանի, իրավական առումով խնդիրներ կարող է առաջացնել։

«Առաջին հայացքից, դա ԱԺ լիազորություններից բխող գործողություն է։ Բայց․․․Իշխան Սաղաթելյանը միակ փոխնախագահն էր, որի ընտրվելուց «կողմ» են քվեարկել ԱԺ-ի բոլոր խմբակցության պատգամավորները, այդ թվում ՝ ՔՊ-ն։ Նույնը ՝ Վահե Հակոբյանի դեպքում։ Իսկ, օրինակ, Ալեն Սիմոնյանը կամ մյուսները միայն ՔՊ-ի  քվեով են ընտրվել։ Այսինքն ՝ նրանք իրենց խմբակցության կողմից են ընտրվել, իսկ այս մարդիկ ՝ ԱԺ-ի։  Հիմա ՔՊ-ն միայն իր խմբակցության որոշումով ողջ ԱԺ-ի կողմից ընտրված մարդուն պաշտոնանկ է անում, ինչն էլ առաջացնում է իրավական հետևանքներ։

Գուցե ԱԺ պատգամավորները չեն իմացել դրա մասին կամ գիտակցաբար են գնացել դրան։

Նրանք այդ որոշումով միացել են ընդդիմությանը և դրանով սկսվել է Նիկոլ Փաշինյանի իշխանազրկման ֆորմալ գործընթացը»,- պարզաբանեց  Ղազարյանը։

Նրա հիմնավորմամբ՝ ԱԺ կանոնակարգով է սահմանված, որ ԱԺ փոխնախագահը պետք է լինի ընդդիմության ներկայացուցիչ։

«Այն որ ԱԺ մի քանի հանձնաժողովի նախագահներ պետք է լինեն ընդդիմության ներկայացուցիչներ, դա ՔՊ-ի բարի կամքը կամ  քաղաքական կամքը չէ։

Դա ԱԺ կանոնակարգ, Սահմանադրական օրենքի պահանջ է։ Այս պահին ԱԺ ղեկավար մարմիններում  ընդդիմության ներկայացուցիչ այլևս գոյություն չունի։

Սա նշանակում է, որ խախտվում է  «Ազգային ժողովի կանոնակարգ»  Սահմանադրական օրենքը։

Իհարկե կա սահմանված ժամկետ, որ ընդդիմությունը կարող է նոր թեկնածուներ առաջադրել նշված պաշտոններին, բայց ակնհայտ է, որ ընդդիմությունը չի առաջադրի։ Եթե չառաջադրեց՝ ստացվում է  «Ազգային ժողովի կանոնակարգ» օրենքը խախտվեց։  Սա նշանակում է, որ ԱԺ-ն դադարում է լինել լեգիտիմ, օրինական իշխանության մարմին։ Եթե ԱԺ-ն դառնում է ոչ լեգիտիմ մարմին, ուրեմն ՝ ինքնաբերաբար ոչ լեգիտիմ է դառնում նաև Կառավարությունը։  Այսինքն՝ այսօրվա որոշումով ՔՊ-ն միացավ ընդդիմությանը, ընդ՝ որում 66 պատգամավոր գիտակցված գնացել են մի որոշման, որի վերջնարդյունքը լինելու է Նիկոլ Փաշինյանի կառավարության ոչ լեգիտիմ վիճակը»,- մանրամասնեց ՍԴ աշխատակազմի նախկին ղեկավարը։

Այս ամենից ելնելով, բանախոսը համոզմունք հայտնեց, որ քաղաքական դաշտում բավականին հետաքրքիր զարգացումներ են սպասվում։

Ավելի մանրամասն՝ տեսանյութում։