Ձեր վստահելի աղբյուրը

«Բաց հասարակության ինստիտուտի օժանդակության հիմնադրամի հայկական մասնաճյուղ» առանձնացված ստորաբաժանումը լուծարելու պահանջի մասին փաստաբաններ Տիգրան Աթանեսյանի և Մարգարիտա Գյուլումյանի հայցադիմումը վարույթ է ընդունվել, այն քննում է Երևանի ընդհանուր իրավասության դատարանի դատավոր Ալեքսեյ Սուքոյանը։ «Դատալեքս» դատական-տեղեկատվական համակարգից տեղեկանում ենք, որ որպես երրորդ անձ ներգրաված է ՀՀ արդարադատության նախարարությունը։ 

Ավելի վաղ Տ.Աթանեսյանը հայտարարություն էր տարածել՝ հայտնելով, որ փաստաբան Մարգարիտա Գյուլումյանը հայցադիմում է ներկայացրել Երևան քաղաքի առաջին ատյանի ընդհանուր իրավասության դատարանին՝ Հայաստանում կոռումպացված օլիգարխ Ջորջ Սորոսի օֆշորային գրասենյակը լուծարելու պահանջով.

«Նկատի ունենալով հարցի խիստ կարևորությունը և հրատապությունը, ինչպես նաև դատական գործերի քննության երկարատև ժամկետները, ելնելով այդ օֆշորային գրասենյակի պետականաքանդ և հակազգային գործունեությունը շուտափույթ դադարեցնելու օրվա հրամայականից, կանխարգելելու համար բոլոր հնարավոր վտանգները, դատարանին միջնորդել ենք կիրառել հայցի ապահովման միջոց և անհապաղ կասեցնել Սորոսի օֆշորային գրասենյակի գործունեությունը՝ մինչև վճռի օրինական ուժի մեջ մտնելը, որից հետո իրականություն կդառնա այդ չարաբաստիկ գրասենյակի վերջնական վտարումը մեր Հայրենիքից:

Հայցադիմումը ունի բոլոր օրինական հիմքերն ու հիմնավորումները, որոնք թույլ են տալիս դատարանին գործելու արագ և ի շահ Հայաստանի Հանրապետության»։

Հայցվորների կողմի ներկայացրած միջնորդությունը՝ հայցի ապահովման միջոց (պատասխանողին որոշակի գործողություններ կատարելն արգելելը, պատասխանողին պատկանող գույքի վրա հայցագնի չափով արգելանք դնելը) կիրառելու վերաբերյալ մերժվել է։