Ձեր վստահելի աղբյուրը

«Պատմամշակութային արգելոց թանգարանների և պատմական միջավայրի պահպանության ծառայություն» ՊՈԱԿ-ը՝ Կամերային երաժշտության ազգային կենտրոնի հետ համատեղ, կներկայացնի «Ընդհատված աղոթքի բրոնզե արձագանքը» խորագրով բացառիկ ցուցադրություն և համերգ, որը տեղի կունենա հուլիսի 13-ին «Զվարթնոց» պատմամշակութային արգելոց-թանգարանում:

ՊՈԱԿ-ից հայտնում են, որ ժամանակավոր ցուցադրությունը նվիրված է Գնդեվանքի վանական համալիրի կրթամշակութային, հոգևոր գործունեության, ժառանգության հանրահռչակմանը:

Կցուցադրվի 1981թ հայտնաբերված հավաքածուն` 43 միավոր առարկա:

Ցուցադրության ժամանակ կօգտագործվեն նաև միջնադարյան ձեռագրերում և այլ նյութերում առկա Գնդեվանքին առնչվող նյութերի, լուսանկարների, չափագրությունների կրկնօրինակները, ինչպես նաև ավանդազրույցներ, ոչ նյութական մշակույթի այլ տարրեր, որոնք կներկայացվեն ժամանակակից տեխնոլոգիաների օգտագործմամբ:

Ցուցադրությանը կհաջորդի համերգային մասը՝ Հայաստանի պետական կամերային նվագախմբի, «Հովեր» պետական կամերային երգչախմբի և դաշնակահար Հայկ Մելիքյանի մասնակցությամբ: Դիրիժոր՝ Լյուք Բաղդասարյան  /Շվեցարիա/։