Ձեր վստահելի աղբյուրը

«Հուլիսին 5-ին, ըստ ավանդույթի, մենք իրար շնորհավորել ենք Սահմանադրության  օրվա կապակացությամբ։ Իրավաբաններն, առհասարակ, միշտ այսօրը նշում են, որովհետև իրավաբանության մեջ կա մեկ հիմնական առանցքային փաստաթուղթ՝  Սահմանադրությունը»,- «Դիմադրության» շարժման բողոքի ակցիայի ժամանակ Սահմանադարական դատարանի դիմաց ասաց «Հայաստան» խմբակցության պատգամավոր Արամ Վարդևանյանը։

Նա  ցավով նշեց, որ այսօր Սահմանադրության գերակայություն չունենք. «Մենք ունենք մի իրականություն, որտեղ օրվա իշխանությունները, որ այսօր ժողովրդից՝ մեզանից, իբրև պաշտպանում են Սահմանադրական դատարանը ոստիկանական ուժերով, եկել ու շրջափակել էին այս դատարանը։ Հենց այդ օրվանից իշխանության և Սահմանադրության միջև ջրբաժան է։ Այս իշխանությունը  գիտի մի բան՝ անտեսի, ոտնահարի, ձերբակալի Սահմանադրությունը։ Իրենք չեն պատկերացնում՝ ինչ է Սահմանադրությունը, ոչ էլ ուզում են  պատկերացնել»։

Նա հիշեցրեց, թե ովքեր էին 1995 թվականին  Սահմանադրության հեղինակները՝  Վլադիմիր Նազարյան, Գագիկ Հարությունյան, Հենրիկ  Խաչատրյան, ու ովքեր են հիմա գրում Սահմանադրություն։

«Այս դեպքում պատկերացնո՞ւմ եք, որ Սահմանադրություն կարող է գոյություն ունենալ, Սահմանադրության արժեք լինի։ Դրա համար չկա այն, դրա համար կա ճգնաժամ ու այդ ամենն  այս իշխանություններն են արել ու անելու են մինչև առանց Նիկոլ Հայաստան չլինի, ու լինելու է»,- ասաց Վարդևանյանը։

Նա նշեց, որ սահմանադրական իրավունքի առաջին էջից մինչև վերջին էջը Սահմանադրություն ոչ թե զուտ գրելն է, ընդունելն է, այլ պաշտպանելը։

«Իսկ Սահմանադրությունն այս իրականությունում, այս իրավիճակում պաշտպանելը լինելու է միայն պայքարի միջոցով»,- ընդգծեց իրավաբան պատգամավորը։

ՍԴ դիմաց ակցիայի մասնակիցները թողեցին «շղթայված» Սահմանդրությունն ու գրիչներ։

«Գրիչներ ենք թողնում այստեղ, որը խորհրդանիշն է սահմանադրականության, Սահմանադրական դատարանի  ինստիտուտի ոտնահարման, երբ դե ֆակտո վարչապետն ինչ-որ գրիչի  զավեշտալի պատմությունով սկսեց ՍԴ յուրացման,  իր սրտի թեկնածուներին ՍԴ դատավորներ նշանակելու գործընթացը։ Այսօր էլ նույն գործընթացը շարունակվում է, ու ՍԴ դատավորներ են նշանակվում մարդիկ, ովքեր որևէ բարոյական ու մասնագիտական իրավունք չունեն այդ բարձր պաշտոնում  լինելու»,- հայտարարեց «Դիմադրության» շարժման անդամ Սևակ Նազարյանը։

Այնուհետև ակցիայի մասնակիցները երթով գնացին դեպի նախագահական նստավայր։

«Նախագահն է, որ Սահմանադրության երաշխավորն է։ Այսօր Հայաստանի նախագահը հանդիսանում է  ՀՀ-ում բանջարանաբոստանային կուլտուրաների ներկայացուցիչ, ոչ մի բան չանող ու մեկ մարդու հրահանգները կատարող»,- ասաց Ս.Նազարյանը։

Ակցիայի մասնակիցները նախագահական նստավայրի դիմաց վարուգներ թողեցին՝ այնուհետև շարժվեցին Ազգային ժողով։