Ձեր վստահելի աղբյուրը

«Մենք վերջին անգամ պահանջել էինք, որ մեր գործը քննչական կոմիտեից տեղափոխեն ԱԱԾ։ Հույս ունենք, որ կբավարարվի մեր պահանջը։ Դրա համար ենք այսօր եկել՝ ստանալու պատասխան»,- գլխավոր դատախազության մոտ բողոքի ակցիայի ժամանակ ասաց 44-օրյա պատերազմում զոհված զինծառայող Էդգար Զաքարյանի հայրը՝ Սևակ Զաքարյանը:

Նրա խոսքով, ամսից ավելի է իրենց գործը քննչական կոմիտեում է, և մինչ օրս ոչ մի շարժ չկա։

«Մենք Արգիշտի Քյարամյանի հետ հանդիպման ժամանակ նշեցինք, որ կանչեն, հարցաքննեն Նիկոլ Փաշինյանին, բայց ոչ մի շարժ չկա: Ինքն ասաց՝ պետք է կանչենք, պետք է հարցաքննեք, բայց չկա որևէ շարժ։ Այն ժամանակ Արգիշտի Քյարամյանը «փափուկ բարձ» դրեց մեր գլխի տակ, ասաց՝ ծանոթանամ նյութերի հետ, բայց ամսից ավելի ի՞նչ կար ծանոթանալու։ Քյարամյանը բեսեդկի ջահելի տպավորություն թողեց, դրա համար չենք վստահում իրեն:

Ուզում ենք գործը տեղափոխվի ԱԱԾ, վերջապես այդ կառույցը ծառայում է հայրենիքին, թող բացահայտի դավաճաններին։ Ավելո՞րդ էին մեր երեխաները, որ տարան, դավաճանեցին, կոտորեցին։ Բացահայտ է, թե ով է դավաճան թուրքը՝ իր հայտնի հայտարարությամբ և այսօր ոչ մի բան չկա։ Եթե ես իմանայի իմ տղան կռվել է և զոհվել հանուն հայրենիքի, կհասկանայի, կլռեի, բայց եթե ես գիտեմ, որ իմ տղային դավաճանել ու թիկունքից խփել են, լռելն անիմաստ է։ Ասում եմ իմ երեխուն, բոլորին նկատի ունեմ»,- ասաց նա։

Լրագրողը հիշեցրեց, որ Արգիշտի Քյարամյանը երեկ գեներալի կոչում է ստացել, Սևակ Զաքարյանն ասաց. «Դե եթե կամակտար է, ոնց թելադրում են, այնպես շարժվում է, բնական է, որ գեներալ էլ կտա, վաղը, մյուս օրը մարշալ էլ կտա: Այդ տականքի թելադրանքով է շարժվում, դրա համար չենք վստահում այդ կառույցին»:

Զոհված զինծառայողներից մեկի հարազատն ասաց, որ ամեն ինչ անելու են գործը տեղափոխվի ԱԱԾ։

«Համար մեկ հողատու դավաճանը չի ուզում, որ գործը գնա ԱԱԾ, դրա համար էլ մինչև հիմա ձգձգվում է։ Պետք է նա հարցաքննվի ԱԱԾ-ում, համապատասխան պատիժը կրեն ինքն ու մնացած մեղավորները»,- նշեց նա։

Արցախյան 44-օրյա պատերազմում զոհված Մխիթար Գալեյանի հոր՝ Գարիկ Գալեյանի կարծիքով,  գլխավոր դատախազն իրենց չի ընդունի, քանի որ «ինքն արդեն ոչինչ է, ոչնչություն է, երևի ասել են այս մեկ ամիսը գնա, արի, մինչև ժամանակդ լրանա, ինքնագլուխ ոչ մի որոշում չես կարող կայացնել»։

«Ցավալին այն է, որ այս երկրում իրավական համակարգում անպատժելիության մթնոլորտ է, Քյարամյանին էլ գեներալի կոչում են շնորհել՝ ինչի՞ համար, որ  լավ ծառայությո՞ւն է մատուցել Նիկոլին. պատերազմից առաջ ԱԱԾ տնօերն նշանակեց, դավաճաններին, թուրքերին բերեցին երկիր, հետո հանեց, տարավ քննչական կոմիտեի պետ, որպեսզի հիմա էլ ծածկադմփոց անի այս տղերքի քրեական գո՞րծը։ Դրա համա՞ր է գեներալ շնորհել։

Մինչև վերջ պայքարելու ենք։ Եթե չհաջողվի, ծնողներս քրեական դատավարության օրենսգիրք կմշակենք ու սկսենք պատժել»,- ասաց Գալեյանը։

Հարցին՝ գործող իշխանության օրոք Փաշինյանին  պատասխանատվության ենթարկելը հնարավո՞ր եք համարում, նա պատասխանեց. «Չեմ կարծում, որ այս իրավապահ համակարգում կան թասիբով տղերք, որ Փաշինյանին ենթարկեն պատասխանատվության։ Բայց մենք մի բան հաստատ կանենք, չեմ թողելու իմ տղու արյունը ... »։

Որոշ ժամանակ սպասելուց հետո ծնողները տեղեկացրեցին, որ գլխավոր դատախազի անունից հայտարարություն արվեց, որ հանդիպում չի լինի, չեն իջնի՝ նորություն չունենալու պատճառով։

«Երևի զանգեց պապային՝ Նիկոլին, ինչ անեմ, եկել են, ասաց՝ ոչ մի բան, հանկարծ չհանդիպես։  Արա,  դու տղամարդ չե՞ս։ Իջար, ասացիր՝ ձեր պահանջն ամենաարդարն է, ճիշտ է, ու դու այսօր պատիվ չե՞ս համար մեզ ընդունես։ Այ թափթփուկ, այ դհոլչի»,- ասաց Գալեյանը։

Հիշեցնենք, որ զոհված զինծառայողների հարազատները հունիսի 30-ին հանդիպել էին գլխավոր դատախազ Արթուր Դավթյանի հետ, ներկայացրել իրենց պահանջը՝ դատախազությունը քննչական կոմիտեում 308-րդ  հոդվածի երկրորդ մասի հատկանիշներով (պաշտոնական լիազորությունների չարաշահում, որն առաջացրել է ծանր հետեւանքներ) հարուցված գործը փոխանցվի ԱԱԾ-ին և գործը քննվի առերևույթ պետական դավաճանության 299-րդ հոդվածով, Նիկոլ Փաշինյանը կանչվի հարցաքննության և գործում ընդգրկվի որպես մեղադրյալ: