Ձեր վստահելի աղբյուրը

«Այո, այս չորս ամիսների ընթացքում ունեցել ենք տնտեսական աճ, բայց այն կրում է կարճաժամկետ բնույթ»,- «Դիմադրության» շարժման նախաձեռնած «Սոցիալական խորացող ճգնաժամ. կեղծ խոստումներ, իրական փաստեր» թեմայով հանրային քննարկման ընթացքում ասաց «Հայաստան» խմբակցության պատգամավոր Հռիփսիմե Ստամբուլյանը՝ հիմնավորելով․

«Եթե մենք նայում ենք 2020 և 2021թ-ի ցուցանիշների համեմատությամբ, ապա 2020թ-ին ունեցած տնտեսական անկումը 2021թ․-ի ընթացքում չենք կարողացել վերականգնել։ Մինչդեռ տարածաշրջանի երկրները, մասնավորապես՝ Վրաստանը ոչ միայն վերականգնել է, այլև ունեցել է տնտեսական աճ։ Հիմա, տնտեսական աճը եղել է սպասարկման և ծառայությունների ոլորտում, ինչը աշխարհաքաղաքական զարգացումների ֆոնի վրա է եղել՝ ռուս-ուկրաինական պատերազմով պայմանավորված»,- ասաց Ստամբուլյանը։

Նրա խոսքով՝ շատ ռուս գործարարներ նույնիսկ եկել են և Հայաստանում բախվելով խնդիրների թողել և գնացել են Վրաստան։

«Մենք կարող էինք ասել, որ Հայաստանը ռեալ տնտեսական աճ ունի,եթե արդյունաբերության մեջ ունենայինք հստակ ցուցանիշներով աճ։ Տնտեսական աճի մեջ որոշակի դեր է ունեցել շինարարությունը,որը պայմանավորված է եկամտահարկով բնակարանների ձեռքբերման օրենքի հետ։ Մարդիկ շտապում են բնակարաններ ձեռք բերել  և շինարարությունը  որոշ չափով աճել է։ Այս ցուցանիշները հնարավոր է մինչև տարեվերջ չշարունակվեն և տարեվերջին ունենանք այլ պատկեր, ինչն ունեցանք 2021թ․-ին»,- պարզաբանեց քաղաքական գործիչը։

Ինչ վերաբերում է արտահանումներին ու ներմուծումներին, ապա նա հայտնեց, որ ատահանման ու ներմուծման աճը նույնպես պայմանավորված է աշխարհաքաղաքական գործոնով։

«Հայաստանը դարձել է տրանզիտ երկիր՝ ներմուծումների և արտահանումների ֆոնին։ Հավի առնելով պետական շահերը, այս մասով շատ փակագծեր չեմ բացի, բայց ակնհայտ է, որ մեր արտահանումն ու ներմուծումն այս ֆոնի վրա է բարձրացել»,- նշեց Ստամբուլյանը։