Ձեր վստահելի աղբյուրը

Հայաստանում 2022 թվականի առաջին կիսամյակի ընթացքում արձանագրվել է աղիքային վարակիչ հիվանդությունների ավելի քան 4 հազար 200 դեպք: Հիվանդացությունը 2021 թվականի համեմատ աճել է 1.2 անգամ: Ասուլիսում այս տվյալները ներկայացրեց ՀՀ ԱՆ Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը։

Նա նշեց, որ այդ ընթացքում արձանագրվել է 7 բռնկում, որից 4-ը սննդային ծագման, 2-ն արձանագրվել են Երևանի հանրային սննդի կազմակերպություններում, մեկական դեպք՝ Կոտայքի և Գեղարքունիքի մարզերում, որոնք պայմանավորված են եղել էքսկուրսիաների  ժամանակ սննդամթերքի պահման, պահպանման, տեղափոխման կանոնների խախտումներով:

«Շատ կարևոր է մի շարք կանոնների պահպանումը, որոնք կարող են  կանխարգելել սննդային գործոնով պայմանավորված աղիքային վարակիչ հիվանդությունների արձանագրումը հատկապես էքսկուրսիաների ժամանակ»,- ասաց նա՝ հավելելով, որ սննդամթերքը պետք է լինի թարմ, գնված լինի խանութներից, ուշադրություն դարձնել սննդամթերքի տեղափոխման, պահպանման պայմաններին, ժամկետներին:

Միրգը և բանջարեղենը պետք է լվանալ հոսող ջրի տակ 2-3 րոպե, սնունդը պատրաստելուց պետք է շատ մեծ ուշադրություն դարձնել ձեռքերի հիգիենային։

Ռ.Աբովյանն ընդգծեց, որ պետք է բացառել պատրաստի սննդամթերքի շփումը հում սննդամթերքի հետ, քանի որ եթե հում սննդամթերքը վարակված լինի, այն հեշտությամբ կարող է վարակել պատրաստի սննդամթերքին։

Հատկապես անհրաժեշտ է ուշադրություն դարձնել առավել արագ փչացող՝ կրեմային հրուշակեղեն, կաթ, կաթնամթերք, միս, մսամթերք, սննդամթերքի պահպանմանը: Նա խորհուրդ տվեց էքսկուրսիաների ժամանակ հնարավորինս խուսափել շատ արագ փչացող սննդամթերք օգտագործելուց։

Ռ.Աբովյանն ասաց, որ հիվանդության առաջին ախտանշաններն ի հայտ են գալիս սնունդն ընդունելուց երկու ժամ հետո և կարող են շարունակվել մի քանի օր: Հիմնական ախտանշաններն են՝ սրտխառնոց, փսխում, գլխացավ, որովայնի շրջանում կտրուկ ցավ:

«Նման ախտանշաններ ունենալու դեպքում խորհուրդ է տրվում անմիջապես դիմել բժշկի: Ինքնաբուժմամբ չզբաղվել, զերծ մնալ հակամանրէային դեղորայք ընդունելուց, քանի որ ոչ նպատակային և  ոչ ճիշտ դեղորայք օգտագործելու արդյունքում կարող են ի հայտ գալ այլ խնդիրներ։ 

Երեխաներն ավելի զգայուն են ու նրանց օրգանիզմը շատ ավելի թիրախավորված է: Ախտանշանների դեպքում անպայման դիմեք մոտակա բուժհաստատություն: Ունենք դեպքեր, երբ երեխայի բուժումը կազմակերպվել է տանը՝ ստամոքսի լվացում, տարատեսակ դեղորայքի ներմուծուոմվ, ինչն էլ ավելի բարդացնում է իրավիճակը»,-ասաց Ռոմելլա Աբովյանը: