Ձեր վստահելի աղբյուրը

Ֆրանսիայի հրապարակում մեկնարկել է «Դիմադրություն» շարժման հանրահավաքը ։

Հանրահավաքի  ընթացքում Լեհաստանում Հայաստանի նախկին դեսպան Էդգար Ղազարյանը իր ելույթում հիշեցրեց հայտնի «Ձորի Միրո» հայկական ֆիլմը։ Երբ Ֆիլմի հերոսը թուրքերից պաշտպանում էր իր հողը, ձորը։ Բայց պաշտպանությունը հաջողություն չունեցավ և նա կորցրեց հողը, ընտանիքը։

«Այդ ֆիլմերով դաստիարակված սերունդը 90-ական թթ․-ին զենք վերցրեց և վերադարձավ  հայրենիքի փրկության պայքարին՝ ազատագրելով մեր երկիրը, Արցախը, Մեր Շենը և Միրոյին  տարավ նորից իր ձորը՝ Բերդաձոր։ Այդ երջանկությունը տևեց այնքան ժամանակ, մինչև մեր կյանք փողոցից ներխուժեց մի խուժան, որը գողացավ մեզանից մեր  հաղթանակները, հայրենիքը և  հպարտությունը։ Ես նրան ասել ու ասելու եմ միշտ՝ հարենիքի գո՛ղ․․․»,- ասաց Ղազարյանը։

Նա այսօրվա ելույթն անվանել է ոչ թե «Ձորի Միրո», այլ ՝ «Բերձորի գող»։

««Բերձորի գողն» ուզում է առանց պայմանագրի, իրավական հիմքի, զենքի և առանց պայքարի թշնամուն հանձնել մեր հայրենիքի  այն հատվածը, որն ազատագրման օրվանից կոչվում է «կյանքի ճանապարհ»։ Փորձում է  կործանել այդ ճանապարհն ու խղել մեր կապը՝ Արցախի քույրերի ու եղբայրների հետ»,- ասաց նա։

Լեհաստանում Հայաստանի նախկին դեսպանը պնդեց, որ նոյեմբերի 9-ի համաձայնագրով որևէ տեղ գրված չէ,թե պետք է ճանապարհ կառուցվի։

«Լաչինի միջանցքը ճանապարհ չէ։ Լաչինի միջանցքը տարածք է,որով անցնում է նաև ճանապարհ, Արցախը Հայաստանի հետ կապող գազատարը, էլեկտրավոլտ գծերը, Արցախը Հայաստանին կապող կապի միջոցները։ Դա միայն ճանապարհ չէ, այլ դա նաև ճանապարհ է։ Հիմա, բանավոր պայմանավորվածություններով սրանք տեղափոխում են մեզ»,- ասաց Ղազարյանը։

Նրա խոսքով՝ Արցախը Հայաստանից կտրելու նոր խարդավանքը գտել են, այդ պատճառով սահամանազատման և սահմանագծման հանձնաժողովի որևէ նիստ չի կայացել։

«Սա նոր ճանապարհն է, որը շրջանցում է Լաչինի միջանցքը։ Այն դուրս է գալիս Հայաստանի տարածքից և մինչև  Արցախի սահման հասնելը, անցնում է միայն Ադրբեջանի կողմից վերահսկվող տարածքով ։ Ուզում եմ  փնտրել և գտնել այն ապուշին, որը կհավատա, թե  ադրբեջանցիները ,որոնք մեր երկրի տարածքում փակել են Գորիս-Կապան մեր կողմից կառուցված ճանապարհը,  իրենց կողմից վերահսկվող տարածքում, իրենց բյուջեով ճանապարհ կառուցեն հայերի համար։ Ո՞վ է դրան հավատալու, ո՞վ է այդ ապուշը։ Ցավոք, մեկին ես գտել եմ՝ նստած է Արցախի նախագահի աշխատասենյակում։ Իսկ այդ մեկին պետք է դուրս շպրտել աշխատասենյակից, իսկ հայրենիքի գողին էլ՝ իր աշխատասենյակից։Միայն այդ դեպքում է հնարավոր փրկել Բերձորն ու Արցախը»,- ավելացրեց Ղազարյանը։