Ձեր վստահելի աղբյուրը

Հայաստանում են բրիտանական London West End ռոք խմբի երգիչները, ովքեր հանդես են գալիս  «Led Zeppelin symphonic» բացառիկ նախագծով։ Համերգը տեղի կունենա հուլիսի 9-ին Երևանի «Հրազդան» մարզադաշտում։

Led Zeppelin լեգենդար խմբի երաժշտությունը կատարում են երեք երգիչներ London West End-ից՝ բրիտանական լավագույն ռոք խմբի և սիմֆոնիկ նվագախմբի ուղեկցությամբ:

Նախագծի երգիչներն են Ջեսսի Սմիթը, Մոլլի Մարիոթը և Փիթեր Էլդրիջ Բայոգը:  Երեք ֆենոմենալ կատարողներին բեմում միանում է ռոք խումբը, որը բաղկացած է Մեծ Բրիտանիայի լավագույն երաժիշտներից՝ Ռիչարդ Սիդվելի երաժշտական ղեկավարությամբ, ով հանդիսանում է Queen Symphonic-ի համաշխարհային շրջագայության հաջողության հետևում կանգնած ֆենոմենը:

Լրագրողների հետ հանդիպմանը Ջեսսի Սմիթն ասաց, որ ոգևորված են Հայաստանում լինելու համար, անհամբեր սպասում են վաղվա համերգին՝ երեկոն դարձնելով առանձնահատուկ։ Փիթեր Էլդրիջի խոսքով, մեկնաբանության առանձնահատուկ ձև է լեգենդար խմբի երգերը՝ սիմֆոնիկ նվագախմբով. «Առանձնահատուկ է։ Պատկերացնում եմ՝ որքան հիանալի կլինի այդ երգերն այս գեղեցիկ երկրներում, այս չքնաղ պատկերների մեջ»։

Մոլլի Մարիոթն ասաց, որ Հայաստանն իրենց համար առաջին կետն է դեպի արևելք, շատ ոգևորված են, տեսել են ու իրենց դուր է եկել այն տարածքը, որտեղ կայանալու է համերգը։ Նա պատմեց, որ Հայաստանի մասին շատ քիչ բան գիտի. «Ամուսինս Պարսկաստանից է, իր միջոցով ավելի շատ տեղեկություն ունեմ ուտեսների, ավանդույթների մասին, բայց իրաանում դա շատ քիչ է»։

Խոսելով նախագծի մասին՝ Ռիչարդ Սիդվելն ասաց. «Տեսնելով սիմֆոնիկ նվագախումբը՝ հանդիսատեսը թող չմտածի, որ դա ամբողջությամբ կլասիկ փոխադրում է։ Իրականում դուք լսում եք նույն խմբին՝ նույն ռոք կազմը, սիմֆոնիկ նվագախումբն ուղղակի հարստացնում ու գեղեցկացնում է ծրագիրը»։

Երգիչների խոսքով, նախագծի նպատակը  ոչ թե կրկնել  Led Zeppelin, այլ ստեղծել այն յուրահատուկ զգացողությունը, որը կունենա հանդիսականը, քանի որ ներկայացվող երաժշտությունը չափազանց  հարուստ է դրամատիզմով։

Ջեսսի Սմիթն ասաց, որ երազում է «The Beatles»-ի երգերով նմանատիպ նախագիծ իրականացնելու մասին։

Փիթեր Էլդրիջի կարծիքով, պարտավորություն է 60-70-ականների ռոք ավադույթները վերականգնելը, փոխանցելը նոր սերունդերին, ու հենց նմանատիպ նախագծերով կարող են  այնպես անել, որպեսզի մարդիկ շարունակեն լսել ու սիրել այդ երաժշտությունը։

Ծագումով Մեծ Բրիտանիայի Ռեդինգ քաղաքից՝ Ջեսսի Սմիթը երգիչ, երգահան և երաժիշտ է։ Նա ճանաչվել է տասնյակ նախագծերի հաղթող՝ ներկայանալով թե´ կենդանի կատարումներով, թե´ ստուդիաներում, այդ թվում՝ Romances, The Quotes, The Classic Rock Show և այլն:

Մոլլի Մարիոթը հանդես է եկել մի շարք աշխարհահռչակ կատարողների հետ՝ The Who-ի, Միք Հաքալի, Ջեֆ Բեքի հետ՝ Rock n Horsepower համերգի շրջանակներում, Ռոբերտ Փլանթի, Վան Մորիսոնի, Մարկ Նոպֆլերի և Իմելդա Մեյի հետ՝ Բիլ Ուայմանսի 80-ամյակի շրջանակներում: Մարիոթի դեբյուտային БTruth is a WolfЮ սկավառակը ներառված է բլյուզի թոփ տասնյակի մեջ, իսկ երկրորդ սկավառակը թողարկվելու է 2022 թվականին:

Փիթեր Էլդրիջ Բայոգը «The Phil Hilborne Band»-ի գլխավոր վոկալիստն է և տարիներ շարունակ աշխատել է ռոք լեգենդների հետ, ինչպիսիք են՝ Նիլ Մյուրեյը և Բերնի Մարսդենը (Whitesnake), Ջեֆ Ուայթհորնը (Procol Harem), Սթիվ Վայը և Բրյուս Դիկինսոնը (Iron Maiden): Վերջին 6 տարիների ընթացքում նա նաև եղել է «Hats Off To Led Zeppelin» խմբի մենակատարը: «Hats Off To Led Zeppelin»-ը բրիտանական միակ խումբն է, որը հավանություն է ստացել Marshall Amplifiers-ի կողմից, իսկ 2013-2016 թվականներին ճանաչվել է լավագույն բրիտանական Zeppelin Tribute Act՝ Մեծ Բրիտանիայի Գործակալների ասոցիացիայի կողմից։

Ռիչարդ Սիդվելը ձայնագրվել և ելույթ է ունեցել բազմաթիվ աշխարհահռչակ արտիստների հետ, այդ թվում ՝ Blur, the Stranglers, Robby Williams, Duran Duran, The Pet Shop Boys, Boy George, Super Furry Animals, Gary Barlow, Jimmy Nail, Buddy Greco, Shirley Bassey, Peggy Lee and Herbert Gronemeyer և այլոք: Տարիներ շարունակ նա աշխատել է West End-ի բազմաթիվ թատրոններում, հանդես է եկել տարբեր հեռուստատեսային և ռադիո հաղորդումներում, մասնակցել է Եվրոպայի բոլոր խոշոր փառատոններում որպես հյուր, ներառյալ Գլաստոնբերիում, Ռոսկիլայում, Բենիկասիմում և այլն:

Համերգը կայանալու է «ՀԱՅԱ» նախագծի շրջանակում։