Ձեր վստահելի աղբյուրը

Քանաքեռ-Զեյթուն վարչական շրջանի Կ. Ուլնեցի փողոցի 49 և 51 շենքերում ամռան գալու հետ խախտվում է ջրամատակարարման գրաֆիկը։

Panorama.am-ի խմբագրություն ահազանգած բնակիչները պատմում են՝ պատահել է, որ ջուրը կտրել են լողանալու ընթացքում, եղել է օր, արթնացել են, տեսել՝ ջուր չկա, ստիպված մոտակայքւոմ ապրող հարազատի, բարեկամի տանն են լվացվել։

Թիվ 51 շենքի բնակիչներից տիկին Լաուրան ասում է՝ բազմաթիվ անգամներ ահազանգել են ընկերությանը, պատասխանողը լսում է դժգոհությունը, տեղեկացնում, որ տարածքում որևէ ջրանջատում չկա, խոստանում է հետ զանգահարել տեղամասի տեսուչի հետ զրուցելուց հետո ու այդպես էլ չի զանգում։

«Մեր շենքի հարևանությամբ գտնվում է «Պեպսի Կոլա»-ի գործարանը։ Մենք կասկածում ենք, որ ջուրը տալիս են գործարանին, դրա պատճառով էլ բնակիչները ջուր չեն ունենում։ Հենց ամառը գալիս է, մեր վիճակն ահավոր է։ Առանց զգուշացնելու երբ պատահի, կտրում են ջուրը»,-նշում է քաղաքացին։

Տիկին Լաուրան ասում է՝ ընկերությանն ահազանգերի ընթացքում առաջարկել են ջուրը կտրել գիշերվա ժամերին կամ էլ նոր գրաֆիկ կազմել, որպեսզի քաղաքացիները կարողանան պլանավորել իրենց գործերը։

«Մեզ ասում են՝ բնակիչների ջուրը «Պեպսի Կոլա»-ին չենք տալիս։ Պոմպն է փչացել։ Բա ինչո՞ւ երբեք ձմռանը չի փչանում պոմպը»,-ասում է տիկին Լաուրան, որ աշխատանքից տուն վերադառնալիս հաճախ է հանդիպում չորացած ծորակին։

Վերջին անգամ ջուրը կտրել են հուլիսի 4-ին՝ երկուշաբթի օրը։ Ընկերությանն ուղղված ահազանգերից, բողոքներից հետո, ըստ բնակիչների, մի քանի օր ջրամատակարարումը կարգավորվում է։

«Վեոլիա Ջուր» ընկերությունից Panorama.am-ին ասացին՝ բնակիչներից վերջին ահազանգը եղել է հուլիսի 4-ին, հուսով են՝ էլ  ահազանգեր չեն լինի։

«Իրոք, այնտեղ խնդիր եղել է։ Տևել է 10-14 օր։ Մի քանի թաքնված վթար է եղել։ Ահազանգից հետո գնացել են, ստուգել են, վերացրել են։ Վերջին օրերին թե 51, թե դրա հարակից շենքերից բողոքներ չեն եղել։ Դժվար խնդիր է եղել, դրա համար աշխատանքերը տևել են այդքան երկար։ Խնդիրը վերացվել է, ճնշումը բավարար է»,-ասաց ընկերության հասարակայնության հետ կապերի պատասխանատու Մուրադ Սարգսյանը։

Անդրադառնալով «Պեպսի Կոլա»-ին ջուր տրամադրելուն, Սարգսյանը նշեց՝ ջուրը ոչ թե տալիս են, այլ վաճառում են։

«Այդ տարածքում պետք է 17 ժամ ջուր լինի։ Ասել ենք, կտանք։ Թե ոնց կտանք, թող մեր գլուխը ցավի։ Բնակիչներն իրավունք ունեն ջուր չլինելու դեպքում բողոքել։ Սեպտեմբերի կեսից արդեն ավտոմատ կանցնենք շուրջօրյայի, ջրի սպառումն ամառվա ընթացքում 25 տոկոսով ավելանում է ծառ ու ծաղիկ ջրելու արդյունքում»,-ասաց նա։