Ձեր վստահելի աղբյուրը

«Հրապարակ» թերթը գրում է.

«Այսօր Գագիկ Ծառուկյանի գլխավորությամբ հանդիսավոր այց տեղի կունենա դեպի Հատիս լեռան գագաթը, որտեղ նախատեսվում է Ծառուկյանի նախաձեռնած Հիսուս Քրիստոսի արձանի տեղադրումը: Շրջայցի ժամանակ նախատեսվում է տարածքի ուսումնասիրություն, նախապատրաստական աշխատանքների վերաբերյալ քննարկում: Մեր տեղեկություններով, միջոցառմանը կմասնակցի նաև ՄԱԿ-ի զբոսաշրջության համաշխարհային կազմակերպության գլխավոր քարտուղար Զուրաբ Պոլոլիկաշվիլին, որի հետ նախօրեին Մադրիդում հանդիպել էր ԱԳ նախարար Արարատ Միրզոյանը:

Զբոսաշրջության համաշխարհային կազմակերպությունը ՄԱԿ-ի այն հեղինակավոր կազմակերպություններից է, որը 150 երկրների զբոսաշրջության ոլորտի աշխատանքներն է կազմակերպում և 500 փոխկապակցված անդամներ ունի: Այցին կմասնակցեն նաև լրատվամիջոցների ներկայացուցիչներ:

Հիշեցնենք, որ արձանն ամբողջությամբ 77 մետր բարձրություն է ունենալու և տեղադրվելու է ամենաբարձրադիր վայրում: Արդեն իսկ ճանապարհ է բացվում դեպի նշված տեղանքը, և շինարարական աշխատանքներն արդեն բավականին առաջ են գնացել: Ճանապարհի կառուցումը և արձանի տեղադրումը, ըստ նախնական հաշվարկների, տևելու են շուրջ 3 տարի»։

Մանրամասները թերթի այսօրվա համարում։