Ձեր վստահելի աղբյուրը

Ռուսաստանի քննչական կոմիտեն 2018 թվականին դուստրերի կողմից սպանված Միխայիլ Խաչատուրյանի դեմ գործն ուղարկել է գլխավոր դատախազություն՝ մեղադրական եզրակացությունը հաստատելու համար։ Այս մասին հայտնում է ՏԱՍՍ-ը՝ հղում անելով իրավապահ կառույցների աղբյուրին։

«Խաչատուրյանի դեմ գործը փոխանցվել է Ռուսաստանի Դաշնության գլխավոր դատախազություն։ Եթե մեղադրական եզրակացությունը հաստատվի վերահսկող մարմնի կողմից, գործի նյութերն, ըստ էության, կուղարկվեն Մոսկվայի Բուտիրսկի դատարան»,- ասել է աղբյուրը։

Միխայիլ Խաչատուրյանը մեղադրվում է սեփական երեխաներին խոշտանգելու, նրանց նկատմամբ սեռական ոտնձգությունների և պոռնոգրաֆիա տարածելու մեջ։ Քննչական կոմիտեն Միխայիլ Խաչատրյանի դեմ գործով նախաքննությունն ավարտել է մայիսի 29-ին։

Խաչատուրյան երեք քույրերը բերման էին ենթարկվել 2018 թվականին իրենց հորը սպանելու կասկածանքով։ Ավագների՝ Քրիստինայի և Անգելինայի գործողությունները որակվել էին որպես կանխամտածված սպանություն, որը կատարվել էր մի խումբ անձանց կողմից: Կրտսեր քրոջ՝ Մարիայի գործը քննվել է առանձին, քանի որ սպանության պահին նա անչափահաս է եղել։ Ավելի ուշ դատարանը նրան անմեղսունակ է ճանաչել։ Քույրերը պատմել են, որ հայրը երկար տարիներ ծաղրել է իրենց։

Փորձաքննությունը հաստատել է, որ Խաչատուրյանը  դուստրերի նկատմամբ բռնություն է կիրառել, ինչի արդյունքում աղջիկները տառապել են հետտրավմատիկ սթրեսային խանգարումով։ Սակայն Խաչատուրյանի մահով պայմանավորված՝ գործի քննությունը կարճվել է։ 2020 թվականի դեկտեմբերին Բասմանի դատարանը պարտավորեցրել է Քննչական կոմիտեին քրեական գործ հարուցել նրա դեմ։ 2021 թվականի մարտին Խաչատուրյան քույրերը տուժող են ճանաչվել իրենց հոր դեմ հարուցված քրեական գործով։