Ձեր վստահելի աղբյուրը

Նախկին  փոխոստիկանապետ Հովհաննես Քոչարյանը գրում է.

«Հին քրեական օրենսգրքի 308-րդ հոդվածի 2-րդ մասը նախատեսում էր պատասխանատվություն պաշտոնեական լիազորությունները չարաշահելու համար, որն անզգուշությամբ առաջացրել էր ծանր հետևանքներ: Քրեական օրենքը պահանջում էր, որ մեղադրանքի կողմը հիմնավորի «դիրքի չարաշահում-դիտավորությամբ էական վնասի պատճառում – անզգուշությամբ ծանր հետևանքների առաջացում» բաղադրիչները:

Չեմ ուզում անդրադառնալ այս իրավանորմի կիրառման ձևախեղումներին, բայց նոր քրեական օրենսգրքի 441-րդ հոդվածի 2-րդ մասը ֆանտաստիկ մեկնաբանությունների հնարավորությունը մեղադրանքի կողմի համար սահմանափակել է: Խոսքը վերաբերվում է 441-րդ հոդվածի 2-րդ մասի 2-րդ կետով սահմանված առանձնապես խոշոր չափերով պատճառված գույքային վնասին, որն ըստ նոր քրեական օրենսգրքի՝ պատժելի է, եթե կատարվել է ԴԻՏԱՎՈՐՈՒԹՅԱՄԲ:

Այսպիսով, պաշտոնական լիազորությունները չարաշահելու այն դեպքերը, որոնք անզգուշությամբ առաջացրել են ծանր վնաս, և ըստ առաջադրված մեղադրանքի՝ ծանր վնասը ունի առանձնապես  խոշոր  չափի գույքային վնասի բնույթ, այլևս  որպես որակյալ հանցակազմ՝  ԱՊԱՔՐԵԱԿԱՆԱՑՎԱԾ են, իսկ  441-րդ   հոդվածը  կոնկրետ  դեպքում ունի հետադարձ ուժ:

441-րդ հոդվածի 2-րդ մասի 5-րդ կետը պատասխանատվություն է նախատեսում այն դեպքերի համար, երբ անզգուշությամբ առաջացրել են «այլ ծանր հետևանքներ»:

Այլ ծանր հետևանքները չեն կարող ունենալ առանձնապես խոշոր չափի գույքային վնասի բնույթ, հակառակ դեպքում կստացվի, որ օրենսդիրը նույն 4-8 տարի ժամկետով ազատազրկում է նախատեսում  հանրորեն վտանգավորության  տարբեր  բնույթ  ունեցող  արարքի համար»։