Ձեր վստահելի աղբյուրը

«Հրապարակ» թերթը գրում է.

«Կապանում «Քաղպայմանագրի» խորհրդի ընտրությունից հետո անցած շաբաթ կրքերը բորբոքվել են։ Մենք քանիցս գրել ենք, որ խորհրդի նախագահի պաշտոնը զբաղեցնելու համար կենաց-մահու պայքար էր տանում ՔՊ-ական պատգամավոր Դավիթ Դանիելյանը, ով վարչապետի աշխատակազմի ղեկավար Արայիկ Հարությունյանի հետ քավոր-սանիկության շնորհիվ մեծ հույսեր ուներ, որ Կապանի համայնքապետ է դառնալու, իսկ դա չստացվելուց հետո` ՔՊ խորհրդի նախագահ:

Ասում են, որ նախընտրական փուլում Կապանում խոստումներ է շռայլել կուսակից ընկերներին, որ իրեն ընտրելու դեպքում անգործ չեն մնա, ինքը կմիջնորդի, համայնքային հիմնարկներում աշխատանքի կտեղավորի բոլորին։ Բանն այն է, որ խորհրդի անդամությունն էլ ռեյտինգային քվեարկությամբ է կատարվում, և ընտրիչներն ընտրում են խորհուրդ:

Ինչպես տեղեկացրել էինք, Դանիելյանի սպասումները հօդս են ցնդել, և նա չի ընտրվել խորհրդի նախագահի պաշտոնում։ Ընտրությունից հետո, մեր տեղեկություններով, սկսվել է ամենաբարդ փուլը` մեղավորներ գտնելու, հաշիվներ մաքրելու, անկատար մնացած խոստումների համար պատասխան տալու։ Պարզ է, որ Դանիելյանին որոշ ՔՊ-ականներ «քցել» են` խոստացել են ընտրել, բայց խոստումը չեն պահել:

Արդյունքում վեճ է ծագել, որի հետևանքով մոտ 10 ՔՊ-ական կուսակցությունից դուրս գալու դիմում է գրել։ Փաստորեն, Արայիկ Հարությունյանի հովանավորյալը, ով հավակնում էր Կապանում «ասող» դառնալ և կուսակցությունը համախմբել, տեղի ՔՊ կառույցի պառակտման պատճառ է դարձել»։

Մանրամասները թերթի այսօրվա համարում