Ձեր վստահելի աղբյուրը

«Արցախպրես»-ի  թղթակցի հաղորդմամբ՝  հուլիսի 19-ից մինչև 21-ը նախատեսվող այցի շրջանակներում այսօր՝ հուլիսի 19-ին,  Աննա Աստվածատուրյան-Թերքոթը հանդիպել է Արցախի Հանրապետության Մարդու իրավունքների պաշտպան Գեղամ Ստեփանյանի հետ:

Հանդիպմանը քննարկվել են Արցախում առկա հումանիտար խնդիրներն ու դրանց լուծման հնարավորությունները:

«Տիկին Աստվածատուրյանը տեղեկացված է այստեղ առկա տարբեր խնդիրներին և պարբերական կապ պահպանելով, արագ արձագանքում է՝ հնարավորին աջակցելով դրանց լուծմանը: Հանդիպմանը նրա հետ խոսեցինք հումանիտար բնագավառում անհրաժեշտ ծրագրերի մասին՝ մասնավորապես, թե  ինչպես կարելի է թիրախային իրականացնել դրանք, որպեսզի հասնենք  կոնկրետ նպատակի:  Շատ կարևոր է նաև «Աննա Աստվածատուրյան» հիմնադրամի կողմից կյանքի կոչված «Սեր Արցախ» ծրագիրը, որի շնորհիվ երեխայի ծննդյան հենց առաջին օրը աջակցություն է ցուցաբերվում նորածինների մայրերին»,- մեզ հետ զրույցում ասել է Գ. Ստեփանյանը՝  հույսով հայտնելով,որ համագործակցությունը շարունակական  կլինի, Աննա Աստվածատուրյանն իր հնարավորությամբ, ներուժով, կապերով կշարունակի  նպաստել արցախցիների կյանքի որակի բարելավմանը:

Կարևորելով Սփյուռքի մասնակցությունը Արցախում հումանիտար խնդիրների լուծման գործում,  Աննա Աստվածատուրյան-Թերքոթը  նշեց, որ ԱՀ Մարդու իրավունքների պաշտպանի հետ անդրադարձել են կրթական, անվտանգային ու կենսական անհրաժեշտություն ներկայացնող առաջնային խնդիրներին:

«Քննարկվեցին Արցախում առկա խնդիրների պատճառները: Գեղամ Ստեփանյանը ներկայացրեց հետպատերազմական հումանիտար իրավիճակը: Պատմեց՝  ինչպես է թշնամին կտրել Արցախի գազամատակարարումը, որն  ապացույցն է, այն բանի, թե ինչ կարող է սպասվել Արցախին, ցանկացած կարգավիճակում թշնամու տիրապետության տակ հայտնվելու դեպքում: Կրթական ոլորտի խնդիրների վերաբերյալ՝  Մարդու իրավունքների պաշտպանից  տեղեկացանք նաև, որ  Շուշիի և Հադրութի երեխաների համար չկան կրթօջախների  հիմնական կառույցներ, ինչպես նաև՝  ուսուցիչների պակաս է զգացվում»,-  նշել է Ա. Աստվածատուրյանը՝ հավելելով, որ հումանիտար խնդիրների լուծման համատեքստում անդրադարձ է եղել  նաև Սփյուռք-Արցախ կապերի ամրապնդմանն ու անելիքներին: