Ձեր վստահելի աղբյուրը

«Այդ հանդիպումից մենք կարող ենք հասկանալ, որ իր պատմության ծանրագույն այս ժամանակահատվածում Հայաստանը գլխիվայր նետվել է պրոցեսի մեջ՝ նախընտրելով այնտեղ լինել միայնակ, առանց դաշնակիցների»,- Հայաստանում ՄԱԿ-ի ներկայացուցչության դիմաց կազմակերպած ակցիայի ժամանակ ասաց «Հայաստան» խմբակցության պատգամավոր Քրիստինե Վարդանյանը՝ անդրադառնալով Թբիլիսիում Արարատ Միրզոյանի և Ջեյհուն Բայրամովի հանդիպմանը:

Պատգամավորը նկատեց, որ Ուկրաինան իր համար դժվար այս կացությունում ցանկանում է բանակցություններում լինել իր դաշնակիցների հետ, իսկ Հայաստանը՝ ոչ:

«ՀՀ-ն այսպիսի բանակցություններում նախընտրում է ինքնագլուխ, «ինչ կուզեմ՝ էն էլ կբանակցեմ» վերելակային դիվանագիտությամբ գնալ սեպարատ բանակցությունների, ձեռք բերել պայմանավորվածություններ, որոնք կանխորոշելու են մեր ապագան»,-հայտարարեց Քրիստինե Վարդանյանը և արձանագրեց, որ շարոնակվում է թուրք-ադրբեջանական համադրված, համակցված քաղաքականությունը և այդ շահերի պաշտպանությունը:

Ընդդիմադիր պատգամավորը հետաքրքրվեց, թե ՀՀ որևէ քաղաքացի կհամաձայնե՞ր, որ իշխանավորներից որևէ մեկը ներկայացնի իր անձնական որևէ շահ, որևէ բանակցության ժամանակ և վստահություն հայտնեց, որ որևէ մի քաղաքացի իր անձնական խնդիրները չի վստահի այս իշխանությունների ներկայացուցիչներին:

«Հետևաբար, այս հանդիպումներում հայակական շահը բացակայում է, մարդիկ, ովքեր պետք է ի պաշտոնե ներկայացնեն այն, մի քանի անգամ հրապարակային հրաժարվել են դրանից և բանակցություններից առաջ իրենք զարմանալիորեն հրապարակային հրաժարվում են հայկական շահը պաշտպանելուց, հետո գնում նստում են բանակցութունների սեղանին և մենք դրանց արդյունքները հետո ենք տեսնում»,-ասաց պատգամավորը և հիշեցնելով, որ այդ գործելաոճը հանգեցրել է աղետալի պատերազմի, նոյեմբերի 9-ի փաստաթղթին, հավելեց.

«Փակ գաղտնի, դռների հետևում ընթանում է գործընթաց և Հայաստանում իշխանական դիրքեր զբաղեցնոնղները որդեգրել են առանց հանրության տեղյակ պահելու, մարդկանց ևս մեկ անգամ կայացած փաստի առաջ կանգնեցնելու քաղաքականություն: Այսինքը մի օր գալու են ու ասեն՝ սա էր, եթե սա չանեինք, ստիպված էինք լինելու Երևանն էլ տալ:

«Դիմադրության» շարժման գործողություններն նաև այդ մասին են՝ չթողնել, որ ևս մեկ անգամ արթնանանք նոյեմբերի 9-ի իրականության մեջ, երբ աղետը տեղի է ունեցել և մենք չգիտենք, թե ինչպես արձագանքենք դրան, կանխել նոր աղետները, որոնք հյուսվում են այս բոլոր առանձին բանակցություններով:

Ի՞նչ պետք է սպասել, երբ Նիկոլ Փաշինյանը կամ Ռուբեն Ռուբինյանը վարում են հերթական կարևոր բանակցություններ, դրա համար պետք է նայել նոյեմբերի 9-ի փաստաթուղթը: Ի՞նչ պետք է սպասել այդ մարդկանցից, որոնք չեն կարողանում թշնամուն ստիպել փաստաթղթում առկա նույնիսկ մի կետի կատարումն ապահովել»: