Ձեր վստահելի աղբյուրը

«Հստակ է, որ Հայաստանում սարսափելի մոնոպոլիզացիայի պայմաններում գները չեն կարգավորվում նույնիսկ այն դեպքում, երբ դոլարի նման արժեզրկում է արձանագրված»,-«Դրամի գերարժևորման և կանխիկ շրջանառության սահմանափակումների խնդիրները» խորագրով քննարկմանն ասաց «Հայաստան» խմբակցության պատգամավոր Արթուր Խաչատրյանը:

Նրա ներկայացմամբ՝ գինի արտադրողը նախորդ տարի պայմանավորվել էր, որ մեկ շիշը կվաճառեր 20 դոլարով, կստանար 10 հազար դրամ, որից 8 հազար ինքնարժեքի պայմաններում 2 հազար դրամը նախընտրելի շահույթ էր, իսկ այսօր արտադրանքի ինքնարժեքը նույնն է մնացել իսկ դոլարի արժեզրկման կամ վաճառքի նվազման պատճառով հասույթը քչացել է և նա կանգնած է ճգնաժամի առաջ, նույն վիճակն է նաև ՏՏ ոլորտում:

Անդրադառնալով խնդրի հաղթահարման ուղիներին՝ բանախոսը բացառեց ԿԲ-ի միջոցով դրամի արժեզրկումը, քանի որ վերջինս ունի ինստիտուցիոնալ շահ՝ դրամն արժևորելով գնաճը պահել 4 %-ի միջակայքում և իր ողջ դրամավարկային քաղաքականությունը դրան է միտված:

Ըստ Խաչատրյանի՝ Ֆինանսների նախարարությանն էլ է այն ձռնտու, քանի որ արտաքին պարտքի սպասարկման խնդիր ունի, որը շատ է մեծանալու 2025 թվականին, և արժեզրկված դոլար իրեն շատ է պետք:

«Այստեղ երկու ֆինանսական մոնստրներ եկել են «հանցավոր համաձայնության», Էկոնոմիկայի նախարարության թափն էլ չի հերիքում»,-հայտարարեց խաչատրյանը և որպես ելք նախանշեց պետության միջամտությունը՝ սեկտորային աջակցության ցուցաբերումն արտահանողներին, որպեսզի դոլարի արժեզրկման հետևանքով հասցվող վնասները մեղմվի:

Ընդդիմադիր պատգամավորի կարծիքով՝ նույն քաղաքականությունը պետք է  վարվի նաև սոցիալական խոցելի շերտերի համար, քանի որ առաջին անհրաժեշտության ապրանքները ոչ թե թանկացել են 9.5 % «ֆանտաստիկ դրական» համարվող չափով, այլ՝ անհամեմատ ավելի շատ և այդ պատճառով էլ պետք է ինդեքսավորվեն այդ խավերի եկամուտները, ինչպես արել է ՌԴ-ն կամ Անգլիան, որը 8.4 մլն մարդուն 650 ֆունտ ֆինանսական աջակցություն տրամադրեց:

Անդրադառնալով կանխիկով գործարքների թեմային՝ Արթուր Խաչատրյանն ասաց, որ որոշ դեպքերում քաղաքացուց բանկերը կոմիսիոններ է պահվում, այն դեպքում, երբ կառավարությունը հավաստիացնում էր, որ նման բան չկա:

«Ինչ վերաբերում է բացասական հարկմանը՝ երբ դու ID քարտով գործարքի դեպքում կարող ես փող հետ ստանալ, ապա ես կատեգորիկ համաձայն չեմ դրա հետ: Պատկերացրե՛ք, ԱԺ ՔՊ-ի պատգամավորներից մեկը երկրորդ Rolls-Royce-ն է ուզում գնել, հիմա ի՞նչ, պետությունը պետք է մի տոկոս իրեն հետ տա՞,  այսինքը՝ մեզնից, բոլորիցս փողը հավաքի, որ իրեն այդ մեքենայի դիամց 1 կամ 0.5 % հետ տա՞, ինչու… Կամ եթե մյուս ՔՊ-ականն ուզի Բենտլի նոր մոդել գնել, կամ թանկանոց տուն, ապա պետությունը պետք է բոլորիցս փող հավաքի՝ իրե՞ն վերադարձնի: Մենք սոցիալական պետություն ենք և դրա հետ ես բացարձակապես համաձայն չեմ»,-հայտարարեց «Հայաստան» խմբակցության պատգամավոր:

Նրա խոսքով՝ նման կարգավորումները սև շուկայի վրա որևէ ազդեցություն չեն գործում, դրանք ուղղակի բանկայան համակարգի պարզ լոբբինգն է, երբ բոլորից փողերը վերցնում տալիս են բանկերին: