Ձեր վստահելի աղբյուրը

«Արմեն Գրիգորյանը չմահացավ դատարանի դահլիճում, նրան սպանեցին և այն այս դավաճան իշխանությունների ձեռքի գործն էր, քանի որ Արմենն ավելի շատ էր սիրում իր հայրենիքը, քան այս իշխանությունները»,-«Հայելի» մամուլի ակումբում ասաց «Հայրենիք» կուսակցության անդամ Արսեն Նիկողոսյանը:

Հայտարարելով, որ պրոդյուսերին սպանել են իր քաղաքական հայացքների համար՝ բանախոսը կարծիք հայտնեց, թե նույն ճակատագիրն է սպասելու բոլոր հայրենասերներին:

«Նիկոլները երկիրը սիրելու փոխարեն, իրենց ստամոքսներն ու դրամապանակներն են սիրում»,-ասաց Արսեն Նիկողոսյանը և կրկնեց, որ Արմեն Գրիգորյանին սպանել է իր մեծ հայրենասիրությունը, մեծ ազգը և դավաճան Նիկոլը:

Նա նկատեց, որ Գրիգորյանի կենդանության օրոք և մահանալուց հետո, վիրավորանքներ են հնչում նրա հասցեին, որը իշխանությունների կողմից ատելությունը Հայաստան բերելու հետևանք է:

«Փողոցում հարցազրույց են վերցնում Սևանա լճի կանաչելու վերաբերյալ, քաղաքացիներն ասում են՝ դրա մեղավորը Ռոբերտ Քոչարյանն ու Սերժ Սարգսյանն են: Երևի դինոզավրներին էլ «Հայրենիք» կուսակցությո՞ւնը, կամ Արթուր Վանեցյա՞նն է սպանել, ինչի հետևանքով նրանք վերացել են Երկրագնդի վրայից»,-ասաց բանախոսը:

Արսեն Նիկողոսյանն այդ ամենի մեղավոր համարեց նաև ընդդիմությանը, քանի որ երբ նրանցից պահանջում էին գործողություններ՝ իրենց քայլեցնում էին, հետո ուղարկում տուն:

Նրա կարծիքով՝ եթե ընդդիմությունը մեկ օրգանիզմի նման չի գործում, ուրեմն այն չկա ու եթե Հայաստանում ընդդիմություն լիներ, ապա այսօր կբռներ Իրանի ձեռքը:

«Ընդդիմությունը փոխանակ Նիկոլին քննադատի, «Հայրենիք» կուսակցությանը,  Արթուր Վանեցյանին է քննադատում: Ընկե՛ր ջան, տղա՛ ջան, Արթուր Վանեցյանն անհասանելի մարդ չէ, հասանելի է, եթե բան ունես իրեն ասելու, եկեք ասեք՝ երկու ամիս օպերայի հրապարակում կանգնած էր: Եթե այդքան տղա չեք, եկել եք տեսախցիկների դեմ սիրունանում եք, որ ի՞նչ: Երբ ընդդիմությանը քննադատող բան եմ ասում, նկարս սկրին են անում և ներքևը գրում, թե այս մադը պառակտում է ընդդիմությանը: Ի դեպ՝ վերջինը «Հայաստան» խմբակցության պատգամավորն է արել»,-ասաց Արսեն Նիկողոսյանը՝ շեշտելով, որ նման ձևով արձաքանքել էին իր այն խոսքին, որ քայլելու փոխարեն պետք է գործողություն արվեր:

Ըստ նրա՝ այդ ամենի մեղավորն, այն ֆեյքերն են, որոնց ոչ միայն իշխանական թևն է օգտագործում, այլ նաև ընդդիմությունը: