Ձեր վստահելի աղբյուրը

Ուկրաինայի փոխվարչապետ Իրինա Վերեշչուկը հայտարարել է, որ երկրի նախարարների կաբինետը օրինագիծ է մշակում, որը քրեական պատասխանատվություն կսահմանի Ռուսաստանի քաղաքացիություն ստանալու համար։ Այս մասին հայտնում է ՏԱՍՍ-ը։

«Ռուսական անձնագիր ստանալու համար քրեական պատասխանատվության սահմանման հարցը քննարկվել է այսօր փակ միջգերատեսչական խորհրդակցության ժամանակ։ Օրինագծի վրա աշխատանքները շարունակվում են, դեռ քննարկումներ կլինեն, բայց ուղղությունը որոշված է»,-ասել է Ուկրաինայի փոխվարչապետը։

Մինչ այդ Վերեշչուկը հորդորել էր որպես հանցագործություն  է համարում ուկրաինացիների կողմից Ռուսաստանի քաղաքացիություն ստանալը՝ անկախ հանգամանքներից։

Նա ռուսական անձնագիր ստանալը «հրթիռներից ավելի վտանգավոր զենք» է անվանել։ Վերեշչուկն ասել է, որ Ռուսաստանին հակազդելու համար ուկրաինական իշխանությունները պետք է ավելի հստակ և կոշտ դիրքորոշում ընդունեն անձնագրեր ստանալու և Կիևի կողմից չվերահսկվող տարածքներում կազմակերպվող հանրաքվեներին մասնակցելու հարցում։