Ձեր վստահելի աղբյուրը

«Չալաբյանի նկատմամբ քրեական գործը հարուցվել էր այն իրադրության ժամանակ, երբ նոր Քրեական օրենսգրքում հավաքներին մասնակցելու համար նյութապես շահագրգռելն ապաքրեականացված էր»,-այսօր հրավիրված ասուլիսում հայտնեց «Համախմբում» շարժման անդամ, հասարակական-քաղաքական գործիչ Ավետիք Չալաբյանի փաստաբան Վարազդատ Հարությունյանը:

Նրա խոսքով՝ Չալաբյանի կալանքի ժամանակ իշխանությունների ԱԺ մոնոմեծամասնությունը, գաղտնի, առանց հանրային քննարկման օրենսգրքի փոփոխությունների նախագծում ներառել է այդ հանցակազմը քրեականացնելու դրույթը և արագ ընթացակարգով՝ երկու ընթերցմամբ ընդունել այն, ինչի արդյունքում հուլիսի 1-ից արդեն նոր Քրեական օրենսգրքով հավաքներին մասնակցելու համար նյութապես շահագրգռելու արարքն կրկին քրեականացվել է

Վարազդատ Հարությունյանի հավաստիացմամբ՝ օրենսգրքի համապատասխան փոփոխությունն արվել է հատուկ Չալաբյանի համար, քանի որ իրենց հայտնի չէ որևէ այլ քրեական գործ, որը հարուցված լինի այդ հոդվածի և այդ արարքի հանցակազմով:

«Մենք երկրորդ անգամ մեր մաշկի վրա զգացինք Դատավոր Արուսյակ Ալեքսանյանի  պրոմեղադրական դիրքորոշումը»,-հայտնեց փաստաբանը՝ տեղեկացնելով, որ վերջին դատական լսումների ժամանակ դատավորը հանդիմանել է  քննիչին, որ նա հուլիսի 7-ին կալանքի տակ պահելու միջնորդություն է ներկայացրել նախկին օերնսգրքով, երբ այն արդեն 7 օր է՝ չէր գործում:

Ըստ Հարությունյանի՝ ՍԴ-ն հստակ դիրքորոշում ունի, որ կալանքի և այլ մեղադրանքների հիմքում պետք է դրվի օրինական հիմքեր և երթե դրանք օրինական չեն, ապա դատարանը հայցին անդրադառնալու խնդիր էլ չունի, միջնորդությունը ենթակա է մերժման:

Սակայն, ըստ փաստաբանի, դատավորն հանդիմանել է քննիչին և նրան 1 օր ժամանակ տվել միջնորդությունն ուղղելու համար, այն դեպքում երբ վերջինս 2 ժամ էր ուզել դրա համար:

Չալաբյանի փաստաբանը նկատեց, որ այդ դեպքում դատավորն իր վրա է վերցրել մեղադրող դատախազի գործառույթները, քանի որ միայն նա կարող էր նման հանդիմանանքով խոսել քննիչի հետ, և ենթադրեց, որ դատավորն ակնհայտ շահագրգռվածություն է ցուցաբերել Չալաբյանին կալանքի տակ պահելու հարցում:

«Նախ, չնայած այն հանգամանքին, որ 2022թ հուլիսի 1-ին է նոր քրեական օրենսգրքը ուժի մեջ մտնել, հենց նույն օրը նախաքննական մարմին ներկայացրեցինք համապատասխան միջնորդություն՝ հնարավոր արարքը նոր քրեական օրենսգրքի համապատասխան հոդվածով որակելու համար, սակայն նշված միջնորդությունը թողնվել է փաստացի առանց քննության, քանի որ դրա վերաբերյալ որևէ պատասխան մինչ այժմ չի ստացվել: Ապա դատարանը իր որոշման մեջ ներառել է ակնհայտ կեղծ տեղեկություններ և նշված կեղծ տեղեկությունների հիման վրա երկարացրել է Ավետիք Չալաբյանի կալանքի ժամկետը:  Հետաքրքրական է, որ քննիչը չի իրականացրել գործի նյութերի ծանոթացման վարույթային գործողություն»,-ասաց Վարազդատ Հարությունյանը և հավելեց. «Այնքան մեծ է գայթակղությունը եղել մեկ վարկյան անգամ Չալաբյանին ազատության մեջ չտեսնելու, որ գնացել են օրենքի կոպիտ, եթե կուզեք՝ հանցավոր խախտման ճանապարհով»:

Փաստաբանը հայտնեց, որ պաշտպանական խումբը պատրաստվում է դռնբաց դատական նիստերի իրականացման միջնորդություն անել, որոնց միջոցով հնարավորություն կունենան ներկայացնելու գործի աբսուրդայնությանը և ընդհուպ մինչև մեղադրանք ներկայացված հոդվածի սահմանադրականությունը վիճարկարկել: