Ձեր վստահելի աղբյուրը

ՀՀ շրջակա միջավայրի նախարարության բնության հատուկ պահպանվող տարածքների և կենսաբազմազանության քաղաքականության վարչության գլխավոր մասնագետ Արամ Աղասյանը Panorama.am-ի հետ զրույցում վստահեցնում է, չնայած նրան, որ արտակարգ իրավիճակների նախարարությունը պարբերաբար տեղեկատվություն է տրամադրում, որ փրկարարները բռնել են գյուրզաներ, սահնօձեր, շահմարներ, տեղափոխել անվտանգ տարածք, Հայաստանի տարածքում օձերի որևէ առանձնահատուկ ակտիվություն չի նկատվում։

«Մարդու շինարակական, գյուղատնտեսական աշխաատանքներն ընդլայնվել են, այսինքն նոր տարածներ են ներառվել մարդու տնտեսական գործունեության մեջ և մեծացել է օձերի ու մարդկանց հանդիպման հավանականությունը։ Ընդամենը սա է, այսինքն մարդիկ են մտնում այն բիոտոպները, այն ապրելավայրերը, որտեղ հանդիպում են այդ օձերը»,- ասաց մասնագետը։

Հայաստանում 23 տեսակի օձ կա, որից 4-ն են թունավոր համարվում, բոլորն էլ իժերի ներկայացուցիչներն են՝ գյուրզա, հայկական իժ, լեռնատափաստանյաին իժ և դարևսկու իժ:
Ա. Աղասյանի խոսքով, սրանցից առավել վտանգավոր են գյուրզա, հայկական իժ տեակները։   Երևանում և շրջակայքում միակ թունավոր օձը գյուրզա տեսակն է, որն, ի դեպ, մարդու համար ամենավտանգավորներից մեկն է։

Նա խորհուրդ տվեց մարդկանց՝ այն տարածքները, որտեղ դեռևս պահպանվել են բնական բիոտոպները, ուղղակի մարդիկ պետք է զգույշ լինեն։ Երևանի դեպքում այդ տարածքներից են Հրազդանի կիրճը, Մոնումենտի այգին, քաղաքն ընդլայնվել է դեպի Աշտարակի կողմ, օրինակ՝ Հարավ-արևմտյան թաղամասի հատվածները։

«Մարդկանց մոտ թյուր տպավորություն կա, որ օձերը շոգ ժամերին են դուրս գալիս։ Օձերի օպտիմալ ջերմաստիճանը 25-26 աստիճան է, շատ ավելի շոգ ժամանակահատվածում ստվերոտ վայրերում են՝ նկուղներ, աղբյուրների մոտ, ակտիվ են լինում առավոտյան և  գիշերային ժամերին»,- ասաց Ա. Աղասյանը։

Նա ընդգծեց՝ երբեք օձերը նախահարձակ չեն լինում. «Այսինքն, եթե մարդը հանդիպել է օձին, առաջին հերթին օձն է մարդուն տեսնելուց խույս տալու և սողալով հեռանալու։  Եթե մարդն ինքն է աշխատում բռնի օձին, փակուղու մեջ է գցում, օձն այդ ժամանակ պաշտպանվելու համար նաև հնարավոր է կծի։ Դա պաշտպանական ռեակցիա է»։

Մասնագետը խոսեց նաև կարիճների մասին, նշեց, որ Հայաստանում երեք տեսակի կարիճներ կան՝ դեղին, խայտաբղետ և հաստապոչ, որը ժողովուրդն ասում է սև կարիճ, որն էլ ամենավտանգավորն է, սակայն շատ քիչ է հավանական մարդկանց հանդիպումը սև կարիճներին. դրանք գիշերային կենսակերպ վարող տեսակ են, հիմնականում գետնափոր կյանք են վարում,  ի տարբերություն մյուս երկու տեսակի, որոնց կարելի է հանդիպել քարերի տակ։

Համացանցը լիքն է միջատների, կարիճների, օձերի  թույնը կծած տեղից հանելու առաջին օգնության գործիքներով, պոմպերով՝ արտածծող հատուկ սարքեր։ Այդ գործիքներից հնարավոր է նաև պատվիրել ինտերնետով։ 
Իսկ բերանով ՈՉ ՄԻ ԴԵՊՔՈՒՄ չի կարելի  թույնը հանել, որովհետև մեծ հավանականությամբ «կներծծվի վալիոդոլի պես»։

Առավել մանրամասն՝ տեսանյութում։