Ձեր վստահելի աղբյուրը

««Համախմբում» շարժման անդամ, հասարակական-քաղաքական գործիչ Ավետիք Չալաբյանի գործին առնչվող ապօրինությունները հերթական անգամ ապացուցում են, որ Հայաստանում խախտված է սահմանադրական կարգը և մեկ անձի կողմից իշխանության բոլոր թևերի իրավազորությունները ուզուրպացված են»,- ասուլիսում ասաց «Համախմբում» նախաձեռնության անդամ, ԵՊՀ դասախոս Մենուա Սողոմոնյանը:

Նա երեք փաստ նշեց ի ապացույց այս հայտարարության։

«Առաջինը՝ թե Քննչական կոմիտեի, թե դատախազության, թե դատարանների կողմից քաղաքական պատվերի կատարում, երկրորդը՝ ԱԺ «Քաղաքաղիական պայմանագիր» խմբակցությունը մեկը մեկ մարդու նման Քրեական դատավարության օրենսգրքում փոփոխություն է կատարում, հանուն նրա, որպեսզի Ավետիք Չալաբյանին մեղսագրվող հոդվածը շարունակի պարունակել հանցակազմ, երրորդը՝ պետական իշխանություններից անկախ հանդիսացող Կենտրոնական բանկը, որի խորհրդի անդամ է Ավետիք Չալաբյանի եղբայրը, իշխանության թելադրանքով հալածանք է սկսվում նաև նրա եղբոր նկատմամբ՝ նպատակ ունենալով նրան հեռացնել աշխատանքից և այդպիսով ազդել Ավետիք Չալաբյանի վրա:

Երկրորդ կարևոր արձանագրումն այն է, որ ապօրինությունների այս միտումը խորանալու է  այն պատճառով, որ Հայաստանի գործընկեր կառույցներն իրենց վարքով, դիրքորոշումներով խրախուսում են: Խոսքը հատկապես վերաբերում է Հայաստանում ԵՄ պատվիրակության ներկայացուցչի վերջին օրերին արած հայտարարությանը, որ, իր կարծիքով, իբրև թե Հայաստանում քաղբանտարկյալներ չկան: Այսպիսի հայտարարությունը կանաչ լույս է վառում Նիկոլ Փաշինյանի կողմից նոր բռնաճնշումներ, քաղաքական հետապնդումներ, հալածանքներ իրականացնելու ճանապարհին»,-ասաց  Մ.Սողոմոնյանը:

Նա համոզված է, որ ՀՀ-ում քաղաքական կոնյուկտուրայի այլ լինելու պարագայում որակապես այլ հայտարարություն կլիներ։

Սողոմոնյանի խոսքով, երրորդ կարևոր արձանագրումը վերաբերում է Ավետիք Չալաբյանին պատժելու քաղաքական պատճառներին. «Այդ պատճառները երկուսն են. առաջին՝ Ավետիք Չալաբյանի անձը որպես քաղաքական հակառակորդ Նիկոլ Փաշինյանին, երկրորդ՝ Չալաբյանի օրակարգը որպես հակընդդեմ օրակարգ այն կործանարար, վտանգավոր ուղեգծին, որն իրականացվում է գործող իշխանության կողմից։ Չալաբյանին պատժելով իշխանությունները փորձում են այսպիսի մարդկանց հեռու պահել քաղաքականդ դաշտից, քաղաքական մրցակցությունից»։

«Նիկոլ Փաշինյանը  և նրան խորհուրդ տվող, նրա իշխանության պահպանման հարցում ներդրում ունեցող տեխնոլոգները շատ լավ գիտեն, թե ինչ է հստակ օրակարգ ունենալը: Ավետիք Չալաբյանը վերջին տարիներին հանդես է գալիս այդպիսի հստակ օրակարգով:

Հայաստանի գործող իշխանությունները որդեգրել են անհասկանալի և սին խաղաղության դարաշրջանը, Ավետիք Չալաբյանի օրակարգը հակադրվում է՝  ցույց տալով, թե ինչպես կարելի է այս վտանգավոր իրողություններին հակադրվել Հայաստան-Ադրբեջան հարաբերություններում ռազմական բալանսն արագ վերականգնելով»,-ասաց Մ. Սողոմոնյանը։

Նա սթափության կոչ արեց. «Ավետիք Չալաբյանի հանդեպ կիրառվող քաղաքական հետապնդումը Հայաստանում տեռորի ժամանակների, 1937 թվի նախանշանն է: Եթե մենք անտարբեր ենք մնում այսպիսի դեպքերին, մենք պետք է ակնկալենք, որ այսպիսի դեպքերը մտնելու են յուրաքանչյուրիս տուն։ Մեզանից յուրաքանչյուրին կարող է սպառնալ այն վտանգը, որ  հարևանի կամ գործընկերոջ անգամ սուտ մատնության պարագայում կարող են պատժվել»: