Ձեր վստահելի աղբյուրը

Հուլիսի 26-ին, չնայած բժիշկների գործադրած բոլոր ջանքերին, մահացել է հուլիսի 17-ին Զանգեզուրի կայազորային հոսպիտալ, այնուհետև Այրվածքաբանության ազգային կենտրոն տեղափոխված պարտադիր ժամկետային զինծառայող, շարքային Պալյան Ջիվանի Պողոսյանը: Այս մասին հայտնում են պաշտպանության նախարարությունից։ 

«ՀՀ պաշտպանության նախարարությունը կիսում է կորստյան ծանր վիշտը և զորակցություն հայտնում Պալյան Պողոսյանի ընտանիքի անդամներին, հարազատներին և ծառայակիցներին»,- նշում են ՊՆ-ից։ 

Հիշեցնենք՝ հուլիսի 25-ին պաշտպանության նախարարությունը հայտնել էր, որ հուլիսի 17-ին ջերմային 2-րդ աստիճանի այրվածքով Զանգեզուրի կայազորային հոսպիտալ է ընդունվել N զորամասի պարտադիր ժամկետային զինծառայող, շարքային Պալյան Ջիվանի Պողոսյանը: Զինծառայողը նույն օրը ռեանիմոբիլով տեղափոխվել է Այրվածքաբանության ազգային կենտրոն։ Պայմանավորված տվյալ ախտահարման դեպքում հիվանդության զարգացման փուլային ընթացքով և այրվածքային ախտահարման ժամանակ հաճախակի հանդիպող հեռակա բարդություններով՝ զինծառայողի առողջական վիճակում դիտարկվել է վատթարացում, գնահատվում էր ծայրահեղ ծանր: 

Ըստ պաշտոնական հաղորդման՝ զինծառայողը այրվածքներ է ստացել վագոն-տնակում վառարանի կայծից առաջացած հրդեհը մարելիս։ 

Նկատենք՝ բանակին մինչ Պատերազմը ելակ խոստացող ՊՆ-ն այսօր անորակ վրան, վագոն-տնակ, անվադողերով դիրքեր ու վառարան՝ ամառվա 40 աստիճան շոգին «ապահովեց»։