Ձեր վստահելի աղբյուրը

Երևան քաղաքի առաջին ատյանի ընդհանուր իրավասության դատարանի «Կենտրոն, Նորք-Մարաշ» նստավայրում, դատավոր Մնացական Մարտիրոսյանի նախագահությամբ  մեկնարկեց հասարակական-քաղաքական գործիչ Ավետիք Չալաբյանի դատաքննությունը: Պաշտպանական խմբի միջնորդությամբ դատաքննությունը դռնբաց է: Դատական նիստերի դահլիճը լեփ-լեցուն է։

Որպես հանրային մեղադրող նիստին ներկայացել է Երևան քաղաքի դատախազության ավագ դատախազ Արմեն Բեգլարյանը։

Ավետիք Չալաբյանը ներկայացնելով իրեն ու պատասխանելով դատավորի հարցին առողջական վիճակի մասին՝ ասաց. «Կարծում եմ՝ բավարար է, եթե այս ամեն ինչը շատ երկար չշարունակվի»։

Նա իր խոսքում ասաց, որ այստեղ քրեական գործ չկա, ծխածածկույթ է։

«Կա վարչախմբի ղեկավար՝ Նիկոլ Փաշինյան, ով իմ և իմ ընտանիքի նկատմամբ հետապնդում է իրականացնում, բոլոր փաստերն աստիճանաբար այս դատական նիստի ընթացքում կբացահայտվեն։

Այդ ծխածածկույթի տակ մեր իրավապահ համակարգում գործող, այսպես ասած կազմակերպված խումբն, իրականացնում է գործողություններ, որ ամեն անգամ փորձում է օրենքը կամայական մեկնաբանելով ինձ պահել կալանքի տակ առանց օրինական ուժի մեջ մտած դատավճռի, որովհետև այս դատավաճիռը երբևէ ուժի մեջ չի էլ մտնելու։ Բոլորը լավ հասկանում են, որ այստեղ չկա հանցակազմ, սա ֆաբրիկացիա է, արվել է ապօրինի ձայնագրությամբ, հազար տեղից մոնտաժված, իրար կցված, կառավարական կայքում հրապարկաված, որի սեփականատերը վարչապետի օգնականն է, դրա հիման վրա քրեական գործ է հարուցվել, ամեն ինչը կախված է երկու վկաներից շանտաժով, իմ աչքի առաջ տեղի ունեցած խոշտնագումներով, կիսատ-պռատ ստացած ցուցմունքներից ու դրանից հետո բազմաթիվ խախտումներից»,- ասաց Ավետիք Չալաբյանը։

«Դատալեքս»-ում հրապարակված մեղադրական եզրակացության համաձայն. «Ավետիք Չալաբյանին մեղադրանք է առաջադրվել այն բանի համար, որ նա 2022 թվականի մայիսի 4-ին Երևան քաղաքի Աբովյան 12 հասցեում գտնվող՝ «Դալան» ռեստորանում, այնուհետև մայիսի 08-ին՝ Հայաստանի ազգային ագրարային համալսարանի ուսանողական խորհրդի սենյակում նշված համալսարանի ուսանողական խորհրդի նախագահ Թոռնիկ Ալիյանին և նրա միջոցով Հայաստանի ազգային ագրարային համալսարանի ուսանողական խորհրդի անդամներին ու համալսարանի ուսանողներին ՀՀ-ում «Դիմադրություն» և «Համախմբում» շարժումների հավաքներին՝ անհնազանդություններ, բողոքի ակցիաներին, ցույցերին, փողոցներ փակելու գործողություններին մասնակցելու նպատակով դիտավորությամբ նյութապես շահագրգռել է՝ առաջարկելով 2.000.000 ՀՀ դրամ գումար»:

Այս գործով անցնում է նաև Էմմա  Սարգսյանը, ում՝ «մեղադրանք է առաջադրվել այն բանի համար, որ նա 2022 թվականի մայիսի 4-ին Երևան քաղաքի Աբովյան 12 հասցեում գտնվող՝ «Դալան» ռեստորանում, այնուհետև մայիսի 08-ին՝ Հայաստանի ազգային ագրարային համալսարանի ուսանողական խորհրդի սենյակում նշված համալսարանի ուսանողական խորհրդի նախագահ Թոռնիկ Ալիյանին և նրա միջոցով Հայաստանի ազգային ագրարային համալսարանի ուսանողական խորհրդի անդամներին ու համալսարանի ուսանողներին ՀՀ-ում «Դիմադրություն» և «Համախմբում» շարժումների հավաքներին՝ անհնազանդություններ, բողոքի ակցիաներին, ցույցերին, փողոցներ փակելու գործողություններին մասնակցելու նպատակով դիտավորությամբ նյութապես շահագրգռել է՝ առաջարկելով 2.000.000 ՀՀ դրամ գումար»: