Ձեր վստահելի աղբյուրը

Ռուսաստանում Գերմանիայի դեսպանատունը չի մասնակցել երկրի նախկին կանցլեր Գերհարդ Շրյոդերի Մոսկվա այցի նախապատրաստմանը։ Այս մասին երեքշաբթի ՏԱՍՍ-ին հայտնել են Գերմանիայի դիվանագիտական ներկայացուցչությունում։

«Մենք լսել ենք, որ պարոն Շրյոդերը ծրագրում էր մեկնել Մոսկվա կամ կարող է արդեն այստեղ լինել: Ցավոք, ավելի ստույգ տեղեկություն չկա: Դեսպանությունը չի օգնել ոչ Շրյոդերի այցի կազմակերպմանը, ոչ էլ հնարավոր բանակցությունների նախապատրաստմանը»,-հայտնել են դեսպանատնից:

Ավելի վաղ Der Spiegel-ը, հղում անելով իր աղբյուրներին, հայտնել էր, որ Շրյոդերը (ԳԴՀ կանցլեր՝ 1998-2005 թվականներին) ժամանել է Մոսկվա՝ էներգետիկ քաղաքականության շուրջ բանակցությունների համար։ Նրանց խոսքով՝ Մոսկվայում բանակցությունների կենտրոնական թեման լինելու է «Հյուսիսային հոսք» գազատարով գազի մատակարարումը։ Ինչպես գրում է թերթը՝ պարզ չէ, թե կոնկրետ ում հետ է Ռուսաստանի մայրաքաղաքում հանդիպելու Գերմանիայի նախկին կանցլերը։

Շրյոդերի կինը՝ Սեո Յոն Կիմ-Շրյոդերը պարբերականին հաստատել է, որ նրա այցի նպատակը էներգետիկայի շուրջ բանակցություններն են։ Ինքը՝ նախկին կանցլերը, Մոսկվայում լրագրողներին ասել է, որ Ռուսաստանի մայրաքաղաքում «հանգստանում է»։ «Նա արձակուրդում չէ, այլ էներգետիկ քաղաքականության շուրջ բանակցություններ է վարում Մոսկվայում»,-իր հերթին ասել է Սեո Յոնգ Կիմ-Շրյոդերը։