Ձեր վստահելի աղբյուրը

«Երեկ Նիկոլ Փաշինյանը մեկ օրով ինձ արգելափակել էր, այդ առիթով ես ահավոր հուզված եմ, մի կերպ դիմացա այդ հարվածին»,-«Հայելի» մամուլի ակումբում կատակեց հիվանդությունից նոր ապաքինված ԱԺ նախկին պատգամավոր Գևորգ Պետրոսյանը՝ անձեռոցիկով սրբելով հիվանդության հետևանքով իր մոտ առաջացող արցունքները:

Նա հիշեցրեց, որ ՀՀ Աշխատանքային օրենսգրքի 158-րդ հոդվածի համաձայն՝ արձակուրդը հանգստանալու և աշխատունակութունը վերականգնելու համար տրվող ժամանակահատված է և հայտարարեց. «Ես ուզում եմ հասկանալ, թե Նիկոլ Փաշինյանն այդ ի՞նչ է արել, որ հիմա էլ գնացել է արձակուրդ»:

Նա հիշեց, որ մինչ այդ Փաշինյանը գնացել էր եղջերու կերակրելու, իսկ մի քանի օր առաջ էլ՝ արշավի էր և առաջարկեց, որ նա գնա Արցախ:

«Սեփական մարզում գնում է արշավի, դա նույնն է, թե գնաս սեփական տանը խուզարկություն անես: Եթե գտնում ես, որ քո հեղինակությունից գոնե պատառիկներ մնացել են՝ գնա Արցախ արշավի: Կամ ի՞նչ արշավի ժամանակն է: Պետություն ենք կորցնում՝ մարդը գնում է արշավի:
Կամ ինչո՞ւ կոպալով: Արշավի կոպալով գնալը նույնն է, ինչ սասիսկիով սուսերամարտ կպնելը»,-հայտնեց Պետրոսյանը:

Նախկին պատգամավորը հարց ուղղեց ԱԱԾ-ին, թե ի՞նչ եղավ Ծիծեռնակաբերդում վայրահաչող թուրքը: Նա հարց ուղղեց նաև Նիկոլ Փաշինյանին, թե ի՞նչ տեսակետների մասին է խոսում Էրդողանը, երբ հայտարարում է, որ Փաշինյանը կիսում է իր տեսակետները և նկատեց, որ եթե ժողովուրդը չգիտի դրանց մասին, ուրեմը Փաշինյանն էլ թափանցիկ չի աշխատում:

Անդրադառնալով սոցապ նախարար Նարեկ Մկրտչյանի՝ պաշտոնյաներին 49 մլն դրամ պարգևավճար տալում փաստի պատզաբանմանը՝ Գևորգ Պետրոսյանն ասաց. «Ժողովո՛ւրդ, լսեք ձեզ ծաղրում են, վերին աստիճանի ձեռք են առնում, ձեզ արդեն քցել են հատակին: Տեսեք, թե ինչ է պատասխանում աշխատանքի և սոցիալական հարցերի նախարարը, եթե այն ասեր տրամվի պարկի Վարթուշը, ինչ որ մի տեղ կարող էր հասկանալի լինել, բայց նախարարն ասում է, որ եթե այդ 49 մլն-ը բաժանեին ՀՀ բնակչության վրա,ապա ամեն մեկին մի դոլար էր հասնելու, դրա համար էլ նպատակահարմար են գտել պարգևատրել բարձրաստիճան պաշտոնյաներին: Որ այդպես է, այսօր տարեք Նիկոլին 2.5 մլն դոլար պարգևատրեք և եթե հարցնեն, թե ինչո՞ւ եք այդ խղճուկ երիտասարդին 2.5 միլիոն պարգևատրել, այնտեղից սոցապ նախարարը կասի, որ եթե այն բաժանեին 2.5 մլն բնակչի վրա՝ ստացվելու էր ամեն մարդուն 1 դոլար, ավելի լավ չէ՞ 2.5 մլն-ը մեկից Նիկոլին տան»:

Նախկին պատգամավորն այն համարեց ծաղր ՀՀ քաղաքացիների և սփյուռքի նկատմամբ, քանի որ սփյուռքից հարցնում են, թե իրենց ուղարկած գումարներն ի՞նչ եղան:

Արձագանքելով 21.5 մլն դրամով կառավարության աշխատակազմի ղեկավարի համար նոր լիֆտ գնելու որոշմանը՝ Գևորգ Պետրոսյանը տարակուսեց, թե կառավարությունը պետական բյուջեն ինչի համար է օգտագործում, այն դեպքում, երբ Արայիկ Հարությունյանը կարիք ունի ոտքով բարձրանալու, որպեսզի նիհարի:

Աժ նախկին պագամավորը քննադատեց նաև իշխանությունների կադրային քաղաքականությունը՝ հայտարարելով, որ պետական համակարգը լցրել են քայլած անգրագետներով, որոնք չգիտեն, թե ինչ են աշխատում, կամ ինչի համար են ԱԺ-ում:

«Իշխանությունները կադրեր ունեն, որ եթե երեք օրով կորցնեն վկայականները, չեն հիշի, թե ինչ են աշխատում»,-հայտարարեց Գևորգ Պետոսյանը և պնդեցմ որ այդ կադրային քաղաքականությունը միտումնավոր է վարվում՝ երկիրը վերջնական անկման տանելու համար: