Ձեր վստահելի աղբյուրը

«Ժամանակի հրամայական է կառավարության կողմից գերակա ճանաչված մարդկային կապիտալի զարգացման հայեցակարգային դրույթների ամրագրումը երկարաժամկետ պլանավորման փաստաթղթում, որն անդրադառնում է ֆորմալ կրթության բոլոր մակարդակներին»,-կառավարության այսօրվա նիստում «ՀՀ կրթության մինչև 2030 թվականի զարգացման պետական ծրագիրը հաստատելու մասին» օրենքի նախագծին հավանություն տալու որոշումը ներկայացնելիս հայտնեց ԿԳՄՍ նախարարի տեղակալ` Արթուր Մարտիրոսյանը:

Նրա խոսքով՝ հանրապետության զարգացումը կարող է ապահովվել մարդկային կապիտալի մեջ շոշափելի ներդրումներ կատարելու միջոցով:

«Կրթությանն ուղղված ֆինանսական միջոցները ոչ թե ծախս են այլ անհրաժեշտ ներդրում պետության և հասարակության զարգացման համար»,-հայտարարեց փոխնախարարը և հավելեց. «Ծրագրի կենտրոնում մարդն է, իսկ նրա կարողությունների ընդլայնումը՝ մարդկային կապիտալը զարգացնելու և իրացնելու միջոց»։

ԱԺ ներկայացվելիք ՀՀ կրթության մինչև 2030 թվականը զարգացման պետական ծրագրի ներածություն բաժնում ասվում է. «Այդպիսի հայեցակերպը պահանջում է համապարփակ մոտեցում ֆորմալ կրթական համակարգի տարբեր օղակներին, շարունակական, լրացուցիչ և ոչ ֆորմալ կրթական հնարավորություններին՝ առանցքում դնելով կրթական միջավայրի ամբողջական փոխակերպումը դեպի մարդու՝ կյանքի բոլոր փուլերում կրթվելու և ստեղծագործելու համար ապահով ու անվտանգ միջավայրի, որտեղ ամեն առանձին բաղադրիչ կապված է մյուսի հետ՝ մարդու կարողությունների լիարժեք և ստեղծարար զարգացման տրամաբանության մեջ։

Ժամանակակից աշխարհում ավելի հաճախ է խոսվում ոչ թե մարդու կրթության, այլ սովորելու իրավունքի մասին, հետևաբար անհրաժեշտ է սովորելը դարձնել ազգային կենսակերպ…  Որակյալ կրթության արդյունավետ միջավայրի հասանելիությունը դառնում է առանձին մարդու կարողությունների զարգացման գլխավոր հարթակը, որն իր հերթին ապահովում է կրթության՝ իբրև հանրային բարիքի, իրացման երաշխիքը։

Անհատի կրթության և սովորելու իրավունքի լիարժեք իրացման համար Ծրագիրը կարևորում է կյանքի տարբեր փուլերում մարդուն անհրաժեշտ որակյալ կրթական ծառայությունների ամբողջական և բազմազան փաթեթի հասանելիությունը յուրաքանչյուր համայնքում և բնակավայրում՝ նպատակ ունենալով ապահովել տարածքային խելամիտ և համաչափ զարգացում ու կյանքի որակի էական բարձրացում:

Միաժամանակ, Ծրագիրը  հռչակում է Հայաստանի Հանրապետության կրթական ծառայությունների և արտադրանքի գլոբալ մրցունակության կարևորությունը՝ նպատակ դնելով ձևավորել կայուն օրակարգ կրթական համակարգի միջազգային ինտեգրման, հայկական կրթական ծառայությունների և արտադրանքի արտահանման հնարավորությունների ընդլայնման համար, ինչպես նաև նպաստել մեծ թվով հայերի հայրենադարձությանն ու ինտեգրմանը՝ նաև Հայաստանում կրթություն ստանալու միջոցով։

Այս նպատակադրումներն առանցքային են դարձնում համակարգի արդյունավետ և ստեղծարար սովորելու միջավայրի վերափոխմանը համարժեք կառավարման թվային և այլ գործիքների ներդնումը, դերերի և պարտականությունների արդյունավետ բաշխումը համակարգի մասնակիցների միջև, կառավարման նոր որակի ապահովումը և ծախսարդյունավետության բարձրացումը…

Ծրագիրը  սահմանում է կրթության ոլորտում Հայաստանի Հանրապետության պետական քաղաքականության ռազմավարական առաջնահերթությունները՝ ներկայացնելով դրանց ներդաշնակ կապը պետական, հանրային և մասնավոր կարիքների, ինչպես նաև համաշխարհային զարգացման միտումների հետ: Հասարակական-քաղաքական իրավիճակը, որի պայմաններում մշակվել է սույն Ծրագիրը, էականորեն տարբերվում է մինչ այս գոյություն ունեցած իրավիճակներից։

Մասնավորապես՝ ներկայում առկա է քաղաքական կամք և հստակ նպատակադրում` կառուցելու իրապես ինքնակառավարվող և ինքնակարգավորվող, կուսակցական ազդեցություններից ազատ, անկախ և նախաձեռնող, խնդիրներ սահմանող և դրանք լուծող, ներառող, ստեղծարար և արդյունավետ կրթական միջավայր բոլորի համար։ Այս առումով Ծրագրի տեսլականի հիմքում Հայաստանի մինչև 2050 թվականը վերափոխման ռազմավարությունն է, և հատկապես առաջին մեգանպատակն է՝ «գիտելիքի, մշակույթի, գիտակցության, հմտությունների համատարած, ներառական, նորարարական և հանրամատչելի զարգացման և յուրացման միջոցով ունենալ քաղաքակիրթ, ստեղծագործ, նախաձեռնող, կարողունակ ու մրցունակ քաղաքացի, ում համար իրավունքների իրացումը նույնքան կարևոր է, որքան պարտականությունների կատարումը, ով առաջին հերթին իրեն է համարում սեփական բարեկեցության և առողջության պատասխանատուն»:

Արթուր Մարտիրոսյանը նաև հայտնեց, որ, ըստ ծրագրի, դպրոց ընդունվող բոլոր երեխաներն առնվազն մեկ տարի ընդգրկված կլինեն նախադպրոցական ծրագրերում:

Մսուրի ծառայություններ կգործեն բոլոր խոշորացված համայնքներում: Բոլոր դպրոցները կունենան պատշաճ կահավորված և արդիական սարքավորումներով հագեցած, սանիտարահիգիենիկ, անվտանգային ստանդարտներին բավարարող և համընդհանուր մատչելի շենքեր: