Ձեր վստահելի աղբյուրը

Կիպրոսի Հայ դատի հանձնախմբի ատենապետ Հակոբ Կազանջյանը և ՀՅԴ Կիպրոսի կոմիտեի ներկայացուցիչ Սիմոն Այնեջյանը մոտեցել են պաշտոնական այցով Կիպրոս ժամանած ՀՀ Սփյուռքի գործերի գլխավոր հանձնակատար Զարեհ Սինանյանին:

Կիպրոսի կառավարությունը կազմակերպել էր համաժողով, որին մասնակցել էր նաև Սփյուռքի գործերի գլխավոր հանձնակատար Զարեհ Սինանյանը: նախորդ օրը ՀՅԴ Կիպրոսի կոմիտեն հայտարարություն էր տարածել` դատապարտելով Սինանյանի այցը Կիպրոս:

ՀՅԴ ներկայացուցիչները մոտեցել Սինանյանին և, իրենց զարմանքը հայտնելով, որ նա մասնակցել է համաժողովին, տարածած հայտարարությունը հանձնել են Սինանյանին: Վերջինս հաստատել է, որ տեսել է այն:

Սինանյանը հայտնել է, որ ՀՅԴ-ի Կիպրոսի ներկայացուցիչների հայտարարության մեջ «ստեր կան», թե իբր ինքը Արցախի դեմ է պայքարել, և հավաստիացրեց, որ ինքը մասնակցություն է ունեցել Հայ դատի կառույցների աշխատանքներին:

ՀՅԴ ներկայացուցիչները նաև Արցախի դրոշն են փոխանցել ՀՀ սփյուռքի գործերի հավատարմատարին, իսկ  վերջինս էլ հայտարարել է, որ դրոշը միշտ էլ իր աշխատասեղանին դրած է եղել:

Հակոբ Կազանջյանը հիշեցրել է, որ Ալեն Սիմոնյանը չպետք է հայտարարեր, որ Թուրքիայից տարածքային պահանջներ չունենք, ինչի հետևանքով հայ-թուրքական հարաբերությունները հաստատելու գործընթացից այդ նախապայմանը Հայաստանը դուրս է հանել:

Սինանյանը պատասխանել է, որ Ալեն Սիմոնյանի ասածների հետ ինքը կապ չունի:

Սիմոն Այնեջյանն էլ հիշեցրել է, որ Զարեհ Սինանյանը Կիպրոսում մասնակցել է մի ժողովի, որի նպատակը թուրքական ծավալապաշտությունը կանխելն է և համոզմունք հայտնել, որ ՀՀ իշխանությունները լրիվ այլ նպատակ ունեն:

Սիմոն Այնեջյանը հայտարարել է, որ Հայաստանի այսօրվա իշխանության որևէ ներկայացուցչի ներկայությունը նվաստացնում է կազմակերպված ժողովի իմաստը, քանի որ Թուրքիայի ծավալապաշտության դեմ պայքարի օրակարգ այսօրվա Հայաստանի իշխանությունը չունի: