Ձեր վստահելի աղբյուրը

Երևանի  Ավան վարչական շրջանում՝ Աճառյանի 2 փակուղի հասցեում, «Քոփփեռ» ՍՊԸ-ն նախատեսում է պղնձի ու ալյումին ջարդոների ձուլարան հիմնել։ Ավանի թաղապետարանում երեկ կազմակերպած հանրային լսումների ժամանակ բնակիչները դեմ են արտահայտվել՝ մատնանշելով դրա հնարավոր ռիսկերը՝ օդի աղտոտվածություն, ազդեցության հանրային առողջության վրա, ինչպես նաև հարևանությամբ գտնվող Աղի կոմբինատ, Բուսաբանական այգի, տարածքում գտնվող բժշկական կենտրոններ։

Ավանի աղի կոմբինատի տնօրեն Արեգ Ղուկասյանը Panorama.am-ի հետ զրույցում ասաց, որ ֆեյսբուքից է տեղեկացել երեկվա քննարկումների մասին, իսկ ձուլարանի ստեղծման նախագծից  տեղյակ չէ, որևէ մեկն իրենց հետ չի խորհրդակցել, կարծիք չի հարցրել։

«Ծանոթ չեմ նախագծին, մեզ չեն ներկայացրել, բայց եթե ձուլարան է լինելու, արտանետումներ է ունենալու, ապա ի՞նչ անհրաժեշտություն կա կառուցել դա այսպիսի խիտ բնակեցված թաղամասում, որտեղ կան նաև սննդամթերք, դեղորայք արտադրող գործարան, հիվանդանոց։ Մի՞թե Հայաստանի տարածքում մի ամայի վայր չկա, որտեղ կարելի է կառուցել այդ ձուլարանն ու շահագործել առանց որևէ մեկին վնաս տալու»,- ասաց նա։

Ա. Ղուկասյանի գնահատմամբ, իհարկե, տնտեսության զարգացման համար լավ է, որ նման բան է կառուցվում, բայց չի հասկանում՝ ինչո՞ւ հենց այս թաղամասում։

Երեկվա հանդիպմանը ներկա «Էկոլոգիական հասարակական միություն» ՀԿ նախագահ, բնապահպան Սիլվա Ադամյանը մեզ հետ զրույցում պատմեց, որ երբ առաջին անգամ է հայտարարվել նման ձուլարանի կառուցման նախագծի մասին, բնապահպաններից որևէ մեկը տեղյակ չի եղել։

«Մի քանի ամիս առաջ է դա եղել։ Ավանի բնակիչներից մեկը մեր գործընկերից մեկին ահազանգել էր, ու բնապահպաններն այդ նախագծի երկրորդ լսմանը ներկա էին։ Ծանոթացել էինք՝ ինչ են ուզում անել, որ մասում։ Նախատեսվում է  մետաղի ջարդոնը ձուլել ու պիտանի նյութ պատրաստել։ Ընդհանուր առմամբ, օգտակար նախագիծ է,  բայց մեզ համար տարօրինակ թվաց, որ հենց Ավանում են ուզում անել, երբ այդ հատվածում Բուսաբանական այգին է, հիվանդանոցներ կան։

Խոսեցիքն այդ մասին, որ լավ կլինի փորձագետներ ներգրավեն ու տարածքը փոխեն։ Նախագիծը ներկայացնող երիտասարդը կոպիտ պատասխանեց՝  մեզ տենց է հարմար, մենք տենց ենք անելու։ Բնակիչներն էլ ասացին, որ իրենց հարմար չէ, բացի այդ կան հիվանդանոցներ, Բուսաբանական այգի։
Բնակիչները հասկացրեցին, որ թույլ չեն տալու»,-ասաց բնապահպանը։

Նրա խոսքով, ուզում են հենց այդ մասում կառուցել, քանի որ տարածքի սեփականատերը տարիներ շարունակ մետաղի ջարդոններ է հավաքել և որոշել է այդտեղ ձուլարան ստեղծել, «թքած ունի ժողովրդի վրա, իսկ բոլորը գիտեն, որ ձուլարանները ծանր արտանետումներ են ունենում»։

Ս.Ադամյանն ասաց, որ հիմա այդ նախագծում փոփոխություններ են կատարել, սակայն դրանք բացարձակ ոչինչ չեն տալու, ոչինչ չեն փոխելու։

«Օրինակ, 1900 տոննա պետք է ձուլեին, 1200 տոննա են ձուլելու, բայց դա ոչինչ չի տա և ո՞վ է ստուգելու, թե իրենք ինչքան են ձուլում։ Մի տեսչական մարմին ունենք, իր գլուխը չի կարողանում պահի, ուր մնաց դրանց ստուգի»,- ասաց բնապահպանը։

Նա ընդգծեց, որ իր համար ամենազավեշտալին առողջապահության նախարարության արձագանքն է. «Քաղաքապետարանը, շրջակա միջավայրի նախարարությունը, իրենց դիրքորոշումներում մոտավոր նշում էին՝ եթե քաղաքացիները դեմ են, չեն լինի, վարչական շրջանի ղեկավարն ուղիղ ասաց՝ եթե չեն ուզում բնակիչները,  չի լինելու,  իսկ առողջապահության նախարարությունը շտկված նախագծի տակ ստորագրել է ու ասել՝ ընդունելի է, որ Ավանում կառուցվի ձուլարան։ Սա նշանակում է, որ նախարարությունը բացարձակ իր դերում չէ, նախարարը  գաղափար չունի, թե ինչ է ձուլարանը, արտանետումները։ Խայտառակություն է»։

Երեկ, նրա խոսքով, ըստ էության, լսումներ չկայացան, ծրագիրը չներկայացվեց, քանի որ քաղաքացիները թույլ չտվեցին, հասկացրեցին, որ իրենք դեմ են։

Սիլվա Ադամյանը տեղեկացրեց, ՀՀ ԳԱԱ Ա. Թախտաջյանի անվան բուսաբանության ինստիտուտի տնօրենի Արսեն Գասպարյանի հետ զրուցել է, վերջինս հայտնել է, որ գիտական հիմնավորումներով նամակ են պատրաստում, որ այդտեղ չի կարող ձուլարան լինել։

«Այգում կան բուսատեսակներ, թռչուններ, կենդանիներ, միջատներ, այսինքն Երևանում գողտրիկ մի կղզի է, ու չի կարող այդ ձուլարանն իր այդ հոտով, արտանետումներով չազդել այդ ամենի վրա։ Այսինքն՝ ուզում են դա էլ ոչնչացնե՞ն»,- ասաց բնապահպանը։

Նա նաև նշեց, որ վերջերս է մոնիտորինգի կենտրոնը հրապարակել խայտառակ տվյալներ. Երևանն օդի որակի, աղտոտվածության առումով սարսափազդու վիճակում է, որևէ տվյալ նորմայի սահմաններում չէ ու այս պայմաններում ուզում են Ավանում ձուլարան կառուցել։