Ձեր վստահելի աղբյուրը

Միացյալ Նահանգների Սենատի Հատկացումների հանձնաժողովը հուլիսի 28-ին հրապարակել է իր 2023թ.-ի ֆինանսական տարվա հատկացումների օրինագիծը, որով վերահաստատվում է ԱԶԱՏՈՒԹՅԱՆ Աջակցության ակտի 907 Բանաձևը և առաջարկվում է 2 միլիոն դոլար՝ Արցախում ականազերծման աջակցության համար, ինչպես նաև մարդասիրական օգնություն՝ տեղահանված հայերին օգնելու համար։ Այս մասին հաղորդում է Ամերիկայի հայկական համագումարը:

Մասնավորապես, Հանձնաժողովի զեկույցում հայտարարվում է, որ «մինչև 2,000,000 դոլար՝ մարդասիրական ականազերծման և չպայթած զինամթերքի մաքրման համար Լեռնային Ղարաբաղի հակամարտությունում մարտական գործողություններից տուժած տարածքներում, որը ենթակա է նախնական խորհրդակցության Հատկացումների հանձնաժողովների հետ», ինչպես նաև «մարդասիրական օգնության Լեռնային Ղարաբաղի հակամարտության պատճառով» տեղահանվածների համար:

Անցյալ ամիս Ներկայացուցիչների պալատն ընդունեց օրինագծի իր տարբերակը, որով կոչ էր արվում 60 միլիոն դոլար օգնություն տրամադրել Հայաստանին և 2 միլիոն դոլար՝ Արցախում ականազերծման աշխատանքների համար: Ներկայացուցիչների պալատի օրինագիծը ներառում էր նաև ԱԶԱՏՈՒԹՅԱՆ Աջակցության ակտի 907 Բանաձևին վերաբերող հատված:

«Հենց նոր վերադարձած լինելով Հայաստանից և Արցախից՝ ԱՄՆ-ի շարունակական աջակցությունն ու ներգրավվածությունը մնում են չափազանց կարևոր։ Համագումարը կշարունակի աշխատել Ներկայացուցիչների պալատի և Սենատի հետ՝ ապահովելու լավագույն արդյունքը հայ ժողովրդին օգնելու համար»,– ասել է Համագումարի Կոնգրեսական հարաբերությունների գծով տնօրեն Մարիամ Խալոյանը։