Ձեր վստահելի աղբյուրը

Արցախի Հանրապետության կրթության, գիտության, մշակույթի և սպորտի նախարարությունը մանկավարժական աշխատողներին և համապատասխան որակավորում ունեցող մասնագետներին հրավիրում է մասնակցելու «Երկարօրյա դպրոց» (1-9-րդ դասարաններ) ծրագրի մանկավարժական աշխատողների նախնական ընտրության հարցազրույցներին:

Արցախի ԿԳՄՍ-ից հայտնում են, որ այս փուլում ընգրկված են Ստեփանակերտի Անտոնիա Արսլան հայ-իտալական կրթահամալիրը, Վաղուհասի և Առաջաձորի համայնքների դպրոցները։

Երկարօրյա ծրագրի մանկավարժական աշխատողները պատասխանատու են լինելու տարրական և միջին դպրոցի երկարօրյա ծրագրի կազմակերպման և իրականացման համար: «Երկարօրյա դպրոց» ծրագրի հնարավորություններին և գործիքներին ծանոթանալու համար առաջիկայում կազմակերպվելու են համապատասխան վերապատրաստումներ, որից հետո կկազմակերպվի մրցույթ:

Թափուր տեղերը զբաղեցնելու համար պահանջվում է բարձրագույն մանկավարժական կրթություն։ Երեխաների հետ աշխատելու մեթոդների, հնարների և տեխնոլոգիաների իմացություն:
Համակարգչով և ժամանակակից այլ տեխնիկական միջոցներով աշխատելու ունակություն։ Microsoft Word, Power Point ծրագրերի իմացությունը պարտադիր է: Հայերեն բանավոր և գրավոր խոսքին տիրապետելու բարձր մակարդակ։ Կազմակերպչական-վարչարարական ունակություններ, վերլուծական կարողություն, ինչպես նաև տրամաբանելու, տարբեր իրավիճակներում կողմնորոշվելու հմտություն, նորարարական և ստեղծագործական հմտություններ։ Պաշտոնը ենթադրում է ներգրավվածություն ինչպես դպրոցի, այնպես էլ համայնքի կրթադաստիարակչական աշխատանքներում:

 Մանկավարժական առավելագույն փորձառությունը և օտար լեզվի իմացությունը կդիտվի որպես առավելություն։

 Մրցույթի արդյունքում հավասար միավորների դեպքում՝ նախապատվություն կտրվի պատերազմի հետևանքով տեղահանված, մանկավարժի որակավորում ունեցող անձանց։