Ձեր վստահելի աղբյուրը

«Եռաբլուր» զինվորական պանթեոնում մեկ ամսից ավելի է ջուր չկա, տարածքում առկա ցայտաղբյուրները չեն գործում, ոռոգման համար նախատեսված խողովակներում ևս ջուր չկա։ Իրենց վերջին հանգրվանն այստեղ գտած զինծառայողների հարազատները պարբերաբար բարձրաձայնում են այդ մասին, սակայն դրան որևէ լուծում չի տրվում։

44-օրյա պատերազմում զոհված զինծառայողների հարազատները դիմելով Panorama.am-ի խմբագրություն, հայտնեցին, որ ջուր չլինելու պատճառով ստիպված տանից են տարաներով ջուր տանում Եռաբլուր։

«Աստված ոչ անի, որ այս տապի ժամանակ որևէ մեկն իրեն վատ զգա, չենք կարող ջուր հասցնել, եթե մեզ մոտ չլինի»,- նշում են նրանք։

Մարդիկ ոչ միայն իրենց հարազատների շիրիմների մոտ դրված ծաղիկների, այլև ծառերը ջրելու համար  են տանից ջուր տանում։ «Մի քանի ծառ կա, գոնե դրանք էլ չչորանան»,- ասում են նրանք։

Նրանց խոսքով՝ սարսափելի վատ վիճակում է գտնվում նաև «Եռաբլուր»-ի միակ զուգարանը, որի գարշահոտից ուղղակի խեղդվում են։ «Զուգարանում էլ ջուր չկա, խայտառակ վիճակ է։ Գոնե այս 1,5 տարվա ընթացքում այն վերանորոգեին։ Չնայած սա ևս մեկ փաստ է այն մասին, թե ինչպես է պետությունը հարգում զոհվածների հարազատներին»,- ասացին խմբագրություն դիմած մարդիկ։

Դեռ երեք ամիս առաջ «Եռաբլուր»-ի տնօրինությունից ծնողներին խոստացել են, որ շուտով 2-3 նոր զուգարան կկառուցեն պանթեոնում, սակայն մինչև օրս այդ ուղղությամբ որևէ աշխատանք չի տարվել։

«Ոչ մի հարց չեն լուծում, միայն խոսում են։ Սա ինչ վիճակ է, սա որ թիվն է»,- ասում են նրանք։

Այս ամենին ավելանում է նաև անտանելի փոշին։ Այստեղ չկան ասֆալտապատ ճանապարհներ, տարածքում շինաշխատանքներ են ընթանում և երեկոյան ժամերին ուժեղ քամու հետևանքով Եռաբլուրն ամբողջությամբ պատվում է փոշով։

«Ամեն օր «Եռաբլուր»-ից տուն եմ վերադառնում փոշու մեջ կորած։ Պատկերացրեք, եթե մեկ օր չգնանք, տապանաքարերը փոշու մեջ կկորչեն»,- նշում է զոհված զինծառայողներից մեկի մայրը։