Ձեր վստահելի աղբյուրը

«Համախմբում» շարժման անդամ, հասարակական-քաղաքական գործիչ Ավետիք Չալաբյանն իր գործով դատական նիստի ժամանակ  միացավ իր պաշտպանների՝ նախագահող դատավոր Մնացական Մարտիրոսյանին ինքնաբացարկ հայտնելու միջնորդությանը։

«Արդեն երկար տարիներ դուք նախագահում է այն դատական գործընթացները, որտեղ քննվում են հանրային բարձր տեսանելիություն ունեցող անձանց հետ կապված գործեր։ Դրանք այն անձինք են, որոնք այս կամ այն կերպ գտնվում են գործող իշխանության հետ որոշակի հակադրության մե»,- ասաց Ավետիք Չալաբյանը՝ դիմելով Մնացական Մարտիրոսյանը։

Նա նշեց, որ չի հիշում որևէ դեպք, երբ դատավորն այդպիսի գործով արդարացնող որոշում է ընդունել:

«Ես ենթադրում եմ, որ այս գործում էլ դուք չեք ընդունելու արդարացնող որոշում, դուք ընդհակառակը, փորձլեու եք ծանրացնել մեղադրանքը: Դա վկայում է  ձեր գործողությունները։

Դուք, ըստ էության, ձեզ վրա վերցրել եք ոչ միայն դատավորի, այլ նաև հանրային մեղադրողի ֆունկցիա, լրացնում եք հանրային մեղադրողի չարածը: Ես չեմ հիշում մեկ դեպք, երբ մեր որևէ փաստարկ ձեր կողմից ընդունվել է:

Ես այս նիստերի ընթացքում չեմ հիշում գեթ մեկ դեպք, երբ մեր որևէ իրավական փաստարկ ձեր կողմից ընդունվի։ Դա ենթադրել է տալիս, որ ապագա դատաքննության ընթացքում ևս մեր կողմից ներկայացված որևէ փաստարկ ձեր կողմից չի ընդունվելու: Դա նշանակում է, որ մենք չենք կարող ակնկալել արդար դատաքննություն»,-նշեց նա:

Ա.Չալաբյանի խոսքով, 5 օրում չորս դատական նիստ է նշանակվել, ո՞րն է այս շտապողականության նպատակը, այն դեպքում, երբ խնդրել էր դատարանին նիստը հետաձգել գոնե մեկ շաբաթով՝ առողջական վիճակը վերականգնելու, սրտանոթային համակարգի կոմպլեքս հետազոտություն է անհրաժեշտ։

«Չեմ հասցրել դա անել։ Իմ առողջական վիճակն իսկապես լուրջ է և կարող է այս շտապողականությունը բերել հենց այս դատական պրոցեսի համար ուղիղ հակառակ արդյունքների: Եթե ես այստեղ Արմեն Գրիգորյանի պես ուշաթափվեմ կամ մահանամ, դրանով ո՞վ է շահելու։

Իսկապես, կորցրել եմ հավատս, որ կարող եք իմ գործով արդար վճիռ կկայացնել։ Դուք էլ գիտեք, որ չեք կարող այդպիսի որոշում կայացնել: Պատճառն էլ գիտեք՝ ինչու չեք կարող: Ուստի մի մտեք այդ մեղքի տակ: Ականջալուր եղեք ինքնաբացարկի միջնորդության հիմքերին»,- ասաց Չալաբյանը։

Դատավոր Մարտիրոսյանը մերժեց ինքնաբացարկի միջնորդությունը։