Ձեր վստահելի աղբյուրը

2022թ. առաջին կիսամյակում Արցախի Հանրապետության տարածքում արձանագրվել է հանցագործության 1276 դեպք (2021թ. առաջին կիսամյակում՝ 872 դեպք, 2020թ. առաջին կիսամյակում՝ 525, 2019թ. առաջին կիսամյակում՝ 456): Տվյալները ներկայացրել է ԱՀ դատախազությունը։ 

2022թ. առաջին կիսամյակում գրանցված հանցագործությունների թիվը 2021թ. նույն ժամանակահատվածի համեմատությամբ աճել է 404-ով, 2020թ. համեմատությամբ՝ 751-ով, 2019թ. համեմատությամբ՝ 820-ով:

2022թ. առաջին կիսամյակում արձանագրվել է մարդու դեմ ուղղված հանցագործության 275 դեպք (2021թ. առաջին կիսամյակ՝ 179, 2020թ. առաջին կիսամյակ՝ 196, 2019թ. առաջին կիսամյակ՝ 172), հասարակական անվտանգության, կարգի և բնակչության առողջության դեմ ուղղված 429 հանցագործություն (2021թ. առաջին կիսամյակ՝ 238, 2020թ. առաջին կիսամյակ՝ 106, 2019թ. առաջին կիսամյակ՝ 107), սեփականության դեմ ուղղված 189 հանցագործություն (2021թ. առաջին կիսամյակ՝ 273, 2020թ. առաջին կիսամյակ՝ 122, 2019թ. առաջին կիսամյակ՝ 121), տնտեսական գործունեության դեմ ուղղված 13 հանցագործություն (2021թ. առաջին կիսամյակ՝ 5, 2020թ. առաջին կիսամյակ՝ 8, 2019թ. առաջին կիսամյակ՝ 5), շրջակա միջավայրի անվտանգության դեմ ուղղված հանցագործության 17 դեպք (2021թ. առաջին կիսամյակ՝ 20, 2020թ. առաջին կիսամյակ՝ 9, 2019թ. առաջին կիսամյակ՝ 6), պետական իշխանության, ծառայության և կառավարման կարգի դեմ ուղղված 96 հանցագործություն (2021թ. առաջին կիսամյակ՝ 122, 2020թ. առաջին կիսամյակ՝ 69, 2019թ. առաջին կիսամյակ՝ 34):

«Թեև հանցավորության ընդհանուր թվում ունենք համեմատական աճ, այդուհանդերձ էականորեն նվազել է սեփականության, պետական իշխանության, ծառայության և կառավարման կարգի դեմ ուղղված հանցագործությունների թիվը, ինչը պատերազմական և հետպատերազմական շրջանին հատուկ նպաստավոր պայմանները հետզհետե վերացնելու արդյունք է:

Ինչպես ենթադրելի է ներկայացված  վիճակագրությունից, ԱՀ իրավապահ մարմիններն աշխատում են գերծանրաբեռնված վիճակում: Թեև քրեադատավարական գործողությունները հաճախ զուգորդվում են հարկադրանքի միջոցների կիրառմամբ, սակայն պետք է հաշվի առնել, որ դրանք ինքնանպատակ չեն և որպես կանոն հետապնդում են քրեական դատավարության օրենսդրությամբ նախատեսված խնդիրների լուծման նպատակ, ուստի խնդրում և հորդորում ենք հանրությանը իրավապահների, հատկապես նախաքննական մարմինների հետ փոխհարաբերություններում լինել համբերատար և հնարավորության սահմաններում աջակցել հետաքննության ու նախաքննության դատավարական գործընթացներին»,- նշում են դատախազությունի: