Ձեր վստահելի աղբյուրը

«Այլընտրանք» ՀԿ համանախագահ, «Հայաստան» դաշինքի անդամ Նարեկ Մանթաշյանը համոզված է՝ ինքը կալանավորվել էր քաղաքական որոշման արդյունքում։

«7 ամիս շարունակ եղել եմ կալանավորված։ Սա այն հայտնի դրոշի ծածանման գործն է, որով դեռևս 2020 թվականի նոյեմբերին դատարանի որոշմամբ հիմնավոր կասկածի բացակայությամբ ազատ էի արձակվել առանց որևէ խափանման միջոցի, բայց մեկ տարի անց քաղաքական ակտիվությամբ պայմանավորված իշխանությունների վախերն ավելացան, և, ի վերջո, քաղաքական որոշման արդյունքում ես կալանավորվեցի»,- ասուլիսի ժամանակ ասաց Նարեկ Մանթաշյանը:

Նա հիշեցրեց, որ կալանքից հետո մենք 8 անգամ գրավի միջնորդություն են ներկայացրել, ամեն անգամ դատարանին ազատ են թողել գումար որոշելու հարցում:

«Վերջում որպես գրավ որոշվեց 20 միլիոն դրամը, դա կարող էր արվել 6 ամիս առաջ, որովհետև, երբ մենք առաջարկում էինք ենթադրանք 3 միլիոն դրամ, մենք միշտ դատարանին թողնում էինք հնարավորություն, որ եթե կա այնպիսի թիվ, որով դատարանը հնարավոր է համարում զսպել իմ վարքագիծը, խնդրում ենք կիրառել այդ գումարը: Այսինքն, եթե դատարանի համար 20 միլիոն դրամն ընդունելի գումար էր, ապա ինչու դա չկիրառվեց 5-6 ամիս առաջ: Չկիրառվեց, որովհետև վստահ եմ, այդ 5-7 ամիսներն օգտագործվել են որպես մահակ քաղաքական իշխանությունների կողմից իմ վարքագիծը զսպելու կամ ինձ փորձելու ընկճել, պայքարից հետ պահել, ինչն ապարդյուն է ու անշնորհակալ գործ»,- նշեց ընդդիմադիր գործիչը։

Նա ընդգծեց, որ շարունակելու է քաղաքական պայքարը։

«Այս պայքարը վաղուց դադարել է ինձ համար քաղաքական լինել։ Նժարին  հայրենիքն է, հայրենիք, պետություն ունենալ-չունենալն է, ամեն վայրկյան մեր սահմանների մոտ կա վտանգ, մեր ժողովրդի գլխին կախված է  վտանգ, ես չեմ կարող իմ տան վտանգի դեմ չպայքարել կամ չփորձել իմ տունն անվտանգ պահել»,- ասաց Նարեկ Մանթաշյանը։