Ձեր վստահելի աղբյուրը

Չինաստանի ժողովրդական ազատագրական բանակի երկու ավիակիր ծով է դուրս եկել և կարող են ուղարկվել Թայվանի նեղուցի տարածք՝ ԱՄՆ Ներկայացուցիչների պալատի խոսնակ Նենսի Փելոսիի Թայբեյ հնարավոր այցից առաջ։ ՏԱՍՍ-ը հայտնում է, որ այդ մասին երեքշաբթի հայտնել է թայվանական Zhongguo Shibao թերթը՝ վկայակոչելով անանուն ռազմական դիտորդին։

«Այս տեղեկատվության համաձայն՝ Լիաոնինգ և Շանդուն ավիակիրները քիչ առաջ լքել են Ցինդաո և Սանյա նավահանգիստները։ Ներկայում պարզ չէ՝ նավերը շարժվում են դեպի Թայվանի նեղուցի գոտի, թե կմասնակցեն զորավարժությունների։ Ամեն դեպքում, դա վկայում է տարածաշրջանում Չինաստանի և ԱՄՆ-ի միջև ռազմական առճակատման աճի մասին»,-հայտնում է հրատարակությունը։

ԱՄՆ ռազմածովային ուժերի հարվածային խումբը՝ «Ռոնալդ Ռեյգան» ավիակիրի գլխավորությամբ, ներկայումս տեղակայված է Թայվանի հարավ-արևելյան ջրերում, երկուշաբթի հայտնել է չինական SCSPI վերլուծական կենտրոնը:

Ըստ թայվանական լրատվամիջոցների՝ Փելոսին երեքշաբթի երեկոյան Թայբեյ է մեկնելու Դեմոկրատական կուսակցությունը ներկայացնող վեց հոգանոց պատվիրակության գլխավորությամբ։

ԱՄՆ Կոնգրեսի ստորին պալատի խոսնակի այցը Թայվան կարող է առաջինը լինել այս աստիճանի ամերիկացի քաղաքական գործչի համար վերջին 25 տարում։ Պեկինը բազմիցս զգուշացրել է ամերիկյան կողմին, որ եթե այցը կայանա, այն անհետևանք չի մնա, և Չինաստանը կոշտ միջոցներ կձեռնարկի։ Վաշինգտոնը կարծում է, որ Պեկինը կարող է քայլեր ձեռնարկել հնարավոր այցի ժամանակ, որը կհանգեցնի ճգնաժամի, ներառյալ հրթիռների արձակումը կամ զորավարժությունները: Թայբեյից ստացված տեղեկությունների համաձայն՝ Թայվանի զինված ուժերը նույնպես բարձր պատրաստվածության են բերվել։