Ձեր վստահելի աղբյուրը

ԱՄՆ Կոնգրեսի Ներկայացուցիչների պալատի խոսնակ Նենսի Փելոսիի ինքնաթիռը ասիական շրջագայության շրջանակում օդ է բարձրացել Կուալա Լումպուրից, հայտնում է Flightradar24 կայքը, որը թույլ է տալիս օնլայն ռեժիմով հետևել ինքնաթիռների դիրքն աշխարհում։ Այս պահին ամերիկյան խորհրդարանի ստորին պալատի նախագահին հետևում է մոտ 318 հազար մարդ։Այդ մասին գրում է «Գազետա ռու»-ն:

Փելոսիի ինքնաթիռի նկատմամբ ուշադրության ավելացումը պայմանավորված է նրանով, որ, ըստ լրատվամիջոցների, խոսնակը պատրաստվում է այսօր՝ օգոստոսի 2-ին, այցելել Թայվան՝ փաստացի անկախ պետություն, որը Չինաստանը համարում է իր տարածքի մի մասը։ Քաղաքական գործչի ծրագրերը Պեկինում չափազանց բացասաբար են ընդունել՝ խոստանալով կոշտ արձագանք Թայբեյ այցելելու դեպքում։

Այս ֆոնին արևմտյան լրատվամիջոցները ակտիվորեն քննարկում են Չինաստանի կողմից Փելոսիի ինքնաթիռի վրա հարձակման հնարավորությունը, որը կարող է հանգեցնել ամերիկա-չինական հակամարտության մեկնարկին։ Տարբեր լրատվամիջոցներում այս մտավախությունները միայն ուժեղանում են Թայվանի մոտ չինական զորավարժությունների, ինչպես նաև վիճելի կղզում ուժերի կուտակման մասին հաղորդումների պատճառով: