Ձեր վստահելի աղբյուրը

«Գլխավորը խնդիրն այն է, որ Ադրբեջանում հասկացել են՝ Հայաստանում կա իշխանություն, որի առաջ  կարելի է դնել պահանջներ, և այդ իշխանությունը գլուխը կախ կատարելու է»,- ասուլիսում ասաց ԱԺ «Պատիվ ունեմ» խմբացության պատգամավոր Տիգրան Աբրահամյանը։

Նա նաև նշեց, որ առաջինը՝ այդ իշխանությունն  առհասարակ ի վիճակի չէ դիմակայություն ապահովելու, երկրորդ՝ ցանկություն էլ չունի։

«Նաև դրանով է պայմանավորված, որ դեռևս այս վերջին ադրբեջանական ագրեսիայից առաջ իշխող քաղաքական ուժն իր ղեկավարների առանձին դեմքերի միջոցով հասարակությանը ոչ միայն  նախապատրաստում էին  զիջումների, այլ նույնիսկ ոչնչանում էին  այն ամենը, ինչ կապված էր մեր պետականության, բանակաշինության հաղթանակների հետ։

Այս իշխանությունն ուզում է  մարդկանց  գիտակցության միջից դուրս բերել, ոչնչացնել այն  ամենը, որ մեր երկիրը, ժողովուրդը հաղթանակներ է ունեցել։ Փորձում են այս հասարակությանը վերածել մեջքը  կոտրվածների, ծնկի եկածների, գլուխը կախ քայլողների հասարակության»,- ասաց ընդդիմադիր գործիչը։

Նա ընդգծեց, որ հասարակությունը պետք է դիմադրի, առանց հասարակական դիմադրության որևէ խնդիր մենք չենք լուծելու։ 

«Բոլոր այն մարդիկ, ովքեր մտածում են թուրքի այս գործողությունները  միայն Արցախի, Բերձորի դեմ է ուղղված, Արցախի առանձին շրջաններին է ուղղված, չարաչար սխալվում են։

Սա Ադրբեջանի կողմից հաշվարկված, քայլ առ  քայլ գնացող գործընթաց է, որը շատ արագ մոտենալու է Երևանի մատույցներին։ Այլ տարբերակ չկա»,- ասաց Տիգրան Աբրահամյանը։