Ձեր վստահելի աղբյուրը

Արցախի Հանրապետության Քաշաթաղի շրջանի Աղավնո գյուղի ղեկավարն ու ավագանու մի քանի անդամներ, ԱԺ խմբակցության ներկայացուցիչներ երեկ հանդիպել են Արցախի Հանրապետության նախագահ Արայիկ Հարությունյանին։

«Պետական տրամադրություններ  չկան, չեն կարող պաշտպանել իրենց հայրենակիցներին։ Չկա այդ ուժը։ Նիկոլ Փաշինյանը լուծարել է  բանակը, չկա Հայաստանի կողմից ոչ մի գրանցված զինվոր։ Այսինքն, կարող է ճանապարհը փակվի ու այդ ամեն ինչի դեմ չենք կարող առնել»,- Panorama.am-ի հետ զրույցում ասաց Աղավնոյի գյուղապետ Անդրանիկ Չաուշյանը։

Նա հարցադրում արեց՝ «հիմա ի՞նչ անենք, էլի թիրախավորե՞նք ժողովրդին»։

Անդրանիկ Չաուշյանը հայտնեց, որ այսօր գյուղ է եկել Արցախի Հանրապետության  տարածքային կառավարման ու ենթակառուցվածքների նախարար Հայկ Խանումյանը։

«Ինքը տարհանման պլան է կատարում։ Եկել էր ժողովրդին լսելու։ Ժողովուրդն ի՞նչ անի։ Մինչև օգոստոսի 25-ը պետք է Աղավնոյի, նաև Բերձորի բնակիչները տարհանվեն»,- ասաց Աղավնոյի գյուղապետը:

Նրա խոսքով, իրենք ուզում են պայքարել, կռվել, ազատագրել հանուն իրենց զոհված ընկերների, բայց գիտեն, որ անիմաստ է։

«Սահմանամերձ գոտում մարդիկ ապրում են, պատրաստ են ամեն ինչի, ինչո՞ւ եք խեղճացնում, ինչո՞ւ եք տալիս։ Այդ ստրուկի հոգեբանությունը մի տարածեք՝ տալով, տալով։ Իր սեփականության հարցում կարող է որոշումներ կայացնել։ Ժողովուրդը երկու տարի  նստած նայում է՝ թե ինչ կլինի, հույսը դնելով պարսիկի, ռուսի վրա»,- ասաց Անդրանիկ Չաուշյանը։

Ի՞նչ են անելու բնակիչները տարհանվելուց հետո։  

«Ասում են՝ Հայաստանի կողմից աջակցություն լինելու է,  վարձակալության գումար տալու են, յոլա տարեք, մինչև տեսնենք։ Բայց ժողովրդին դա պետք չէ։ Ժողովուրդը կիսատ, մեռած վիճակում է հիմա։ Դրա համար ժողովրդի վրա չբարդեք, թե ինչու չեք պայքարում և այլն։ Պայքարելու համար զինտեխնիկա է պետք ու ամեն ինչ, ոչ թե ձեր կողքին ենք ու այդպես  օդում խոսակցություններ»,- ասաց Աղավնոյի գյուղապետը։

Նա վերջում ընդգծեց՝ չլինի այնպես, որ իրենց պատճառով լինեն անմեղ զոհեր։