Ձեր վստահելի աղբյուրը

«Լինի ընդդիմություն, թե մտավոր ունակություններ ունեցող խավ, նրանք ավելի մեծ պարտականություն ունեցող խավ են, քան ամենօրյա հոգսը հոգացող սովորական մարդիկ»,-«Հայելի» մումալի ակումբում հայտնեց ՀՀ նախկին օմբուդսմեն Լարիսա Ալավերդյանը՝ շեշտելով որ ինքը դեմ է եղել ընդդիմադիր գործչի այն հայտարարությանը, թե ժողովուրդը պետք է արթնանա, որ խնդիր լուծվի:

Բանախոսը նաև համաձայն չէ այն խոսակցությունների հետ, որ ընդդիմությունն իր այս գործողություններով ներքին կարգով պաշտպանում է իշխանություններին, այլ ամբողջ խնդիրն այն է, որ նա պատրաստ չէր նման զարգացումներին:

«Շրջանառվում է երկու տեսակետ, թե մեր երկրի ղեկավարը հիվանդ է, կամ թուրք է: Ես երկուսին էլ դեմ եմ: Պետք չէ թուրք լինել, որպեսզի ունենալ թուրքական քաղաքական կողմնորոշում: Այն, որ այս իշխանությունների գործողություններն ամբողջովին կարելի էր բնութագրել որպես՝ Թուրքիայի դրածո իշխանության, այն ընկալելի է, բայց էթնիկականի հետ ես երբեք չեմ կապի»,-ասաց Լարիսա Ալավերդյանը և հավելեց. «Երկրորդ՝ ո՞վ է հիվանդ՝ նրանք, որոնք հավատում են այդ գռեհիկ բառապաշարով ներկայացվող խոսքին, թե՞ նա, ով այդ գռեհիկ բառապաշարով, հզոր կամքով, քայլ առ քայլ իրականացնում են թուրքական ցեղասպանական քաղաքականությունը:

Այնպես որ՝ եկեք հստակեցնենք՝ այսօր ո՛չ կամազուրկ իշխանություն ունենք, ո՛չ էլ՝ պատահական եկած և ունակություններ չունեցող: Նրանք ունակություն չունեն իրական կառավարում իրականացնել հօգուտ պետությանը և  ժողովրդի, նրանք այդ հմտությունները չունեն: Իրենց այն չեն սովորացրել և չի էլ պահանջվում: Իրենցից պահանջվում է անշեղորեն կատարել թուրքական ցեղասպանական այս ծրագիրը և դրա մեջ ընդգրկել բավական մեծ թվով հասարակ մարդկանցից բաղկացած խավերին: Հմուտ մանիպուլյատիվ տեխնոլոգիաներին պատրաստ չէր այս՝ իրոք շատ դյուրահավատ ժողովուրդը»:

Ալավերդյանը սակայն հիշեց, որ ժամանակին ամենազարգացած ազգերը՝ գերմանացիները, իտալացիները, իսպանացիները չկարողացան դիմանալ մանիպուլյատիվ այդ մեխանիզմներին, բայց կա մեծ տարբերություն նանցիստական երկրների և Հայաստանի իշխանությունների գործողություններում՝ առաջինները ի շահ իրենց երկրի էին գնում դրան, իսկ Հայաստանում՝ ի շահ թշնամական պետության::

ՀՀ նախկին օմբուդսմենը նկատեց, որ ՀՀ իշխանությունները սպասարկում են Ադրբեջանի և Թուրքիայի շահերը և դրան զուգահեռ Ռուսաստանին ասում՝ թե արի իմ համար պայքարի թյուրքական պետությունների դեմ, ինչը տրամաբանական չէ:

«Ամեն մի ժողովուրդ իր ճակատագրի տերն է, տղա՞ ես՝ տեր կանգնիր, եթե ոչ՝ տեր կանգնող լինելու է, և այն չի լինելու հօգուտ մեր ազգի»,-հայտարարեց Լարիսա Ալավերդյանը: