Ձեր վստահելի աղբյուրը

Եվրոպական ֆուտբոլային ասոցիացիաների միությունը (ՈՒԵՖԱ) պատժել է «Ֆեներբախչեին» այն բանի համար, որ ակումբի երկրպագուները Ստամբուլում Կիևի «Դինամոյի» հետ Չեմպիոնների լիգայի որակավորման երկրորդ փուլի խաղում վանկարկել են Ռուսաստանի նախագահ Վլադիմիր Պուտինի անունը։ Լուրը հայտնում է «Գազետա ռու»-ն:

Թուրքական ակումբը պատժվելու է եվրոպական մրցաշարերում մեկ տնային հանդիպման համար տրիբունաների մասնակի փակման տեսքով։ Բացի այդ, «Ֆեներբախչեն» պետք է վճարի 50 հազար եվրո տուգանք։

Հիշեցնենք, որ Կիևի «Դինամոն» երկու հանդիպումների արդյունքում հաղթեց «Ֆեներբախչեին»։ Լոձում կայացած առաջին խաղն ավարտվել էր ոչ-ոքի՝ 0:0 հաշվով, իսկ Ստամբուլում կայացած պատասխան խաղում կիևցիներն ավելի ուժեղ գտնվեցին և հաղթեցին 2:1 հաշվով:

Այս խաղի ընթացքում թուրք երկրպագուները 57-րդ րոպեին բաց թողած գոլից հետո սկսեցին վանկարկել Վլադիմիր Պուտինի անունը։