Ձեր վստահելի աղբյուրը

Չինաստանի իշխանություններն անհրաժեշտ են համարում միավորել համաշխարհային հանրության ջանքերը՝ հակազդելու ԱՄՆ-ի անսկզբունքային ճնշմանը և այլ պետությունների ներքին գործերին միջամտությանը։ ՏԱՍՍ-ի փոխանցմամբ՝ այս մասին ասվում է շաբաթ օրը Չինաստանի ԱԳՆ կայքում հրապարակված հայտարարության մեջ։

«Եթե մենք ուշադրություն չդարձնենք Վաշինգտոնի միջամտությանը մեր ներքին քաղաքականությանը, այս աշխարհը կվերադառնա ջունգլիների օրենքներին, և Վաշինգտոնն էլ ավելի անբարեխիղճ կդառնա՝ ուժ կիրառելով այլ երկրներին ճնշելու համար»,-հայտարարել է Չինաստանի արտգործնախարար Վան Ին:

Կամբոջայի մայրաքաղաք Պնոմպենում լրագրողների առջեւ ելույթում նա սել է, որ Չինաստանը չի կարող թույլ տալ, որ Միացյալ Նահանգները կրկին նման քայլեր ձեռնարկի։

Ինչպես պարզաբանել է Չինաստանի արտգործնախարարը, Փելոսիի վերջին այցը ցույց տվեց, որ ԱՄՆ իշխանությունները ուշադրություն չեն դարձնում այլ երկրների դիրքորոշմանը, որոնք սեփական ինքնիշխանության դեմ ոտնձգությունների հետ կապված անընդհատ բողոքում են Սպիտակ տան դեմ։
«ԱՄՆ-ը կոպտորեն խախտում է իր պարտավորությունները՝ լրջորեն խաթարելով խաղաղությունն ու կայունությունը Թայվանի նեղուցում»,-ասել է Վան Ին։

Նրա խոսքով՝ Թայվանի շուրջ Չինաստանի Ժողովրդա-ազատագրական բանակի զորավարժությունները «թափանցիկ են, պրոֆեսիոնալ և հաշվի են առնում ինչպես ազգային օրենսդրությունը, այնպես էլ միջազգային իրավական նորմերը:

«Մենք հաստատակամորեն պաշտպանելու ենք մեր երկրի ինքնիշխանությունն ու տարածքային ամբողջականությունը, և ոչ մի դեպքում թույլ չենք տա ԱՄՆ-ին մանիպուլյացիայի ենթարկել Թայբեյը՝ Չինաստանին զսպելու համար»,-եզրափակել է չինացի նախարարը։