Ձեր վստահելի աղբյուրը

Հայաստանի ֆոնդային բորսայում օգոստոսի 9-ին տեղի են ունեցել 23,501,160,000 մլրդ դրամ ընդհանուր ծավալով պետական պարտատոմսերի տեղաբաշխման և հետգնման աճուրդներ։
AMX Հայաստանի ֆոնդային բորսայից հայտնում են, որ մասնավորապես, AMGN60294276 տարբերակիչ ծածկագրով և 5 տարի մարման ժամկետով պետական պարտատոմսերի աճուրդի տեղաբաշխման ծավալը կազմել է ավելի քան 18,8 մլրդ դրամ, իսկ պահանջարկը՝ ավելի քան 31 մլրդ դրամ: Աճուրդի միջին կշռված եկամտաբերությունը կազմել է 11.4925%, իսկ արժեկտրոնի տարեկան եկամտաբերությունը 9.4% է:

«Սա վկայում է ֆինանսական շուկայի կայունության, գրավչության և ՀՀ պետական պարտատոմսերի նկատմամբ վստահության պահպանման մասին։

Հատկանշական է նաև այն, որ համեմատաբար կայուն եկամտաբերության պարագայում ներդրողները շարունակում են իրենց միջոցները ներդնել Հայաստանի Հանրապետության պետական պարտատոմսերում։

Պետական պարտատոմսեր հնարավոր է ձեռք բերել ինչպես Հայաստանի ֆոնդային բորսայի առևտրային հարթակում, այնպես էլ՝ gp.minfin.am առցանց հարթակի միջոցով»,- նշում են Հայաստանի ֆոնդային բորսայից։