Ձեր վստահելի աղբյուրը

«Կառավարության որոշմամբ հատկացվելիք գումարներով երեք հատվածներում կիրականացվեն կամ կավարտվեն ճանապարհաշինական աշխատանքները»,-կառավարության նիստում հայտնեց տարածքային կառավարման և ենթակառուցվածքների նախարար Գնել Սանոսյանը՝ ներկայացնելով ճանապարհաշինության համար բյուջեից հերթական միլիարդների տրամադրման նախագիծը:

Նախարարը տեղեկացրեց, որ այդ երեք հատվածներից մեկը Լոռու մարզում է:

«Բայց այդ 8.1 կմ ճանապարհից այս տարի 6 կմ-ն կանենք, մնացած հատվածում նախատեսված է խողովակների փոխման գործընթաց, այն կանենք այլ ծրագրով և այդ հատվածի ասֆալտապատմանը կանցնենք հաջորդ տարի»,-ասաց Սանոսյանը:

Նրա խոսքով՝ մյուս հատվածը Սիսիան-Դաստակերտն է և երրոդը՝ Տաթև-Աղվանի հայտնի ճանապարհահատվածի 17.5 կմ-ը:

«Տաթև-Աղվանի հատվածում առաջ եկած թերությունները վերացվեցին և հիմա վերին շերտ են տեղադրվում և դրա համար գումար է պետք հատկացնել: Ընդհանուր առմամբ 2 մլրդ 734 մլն դրամ է նախատեսված նախագծով, որից  2 մլրդ 689 մլն-ը շինարարության համար է, 25 միլիոնը՝ տեխնիկական հսկողության, իսկ 19 մլն-ը հեղինակային հսկողության համար է նախատեսված»,-հայտարարեց ՏԿԵ նախարարը:

Նիկոլ Փաշինյանը հերթական անգամ փորձեց արդարանալ Տաթև-Աղվանի հատվածի՝ կառուցելուց արդեն ամիսներ անց ի հատ եկած լուրջ թերությունների համար՝ պնդելով, որ այն կառուցվել էր ֆորսմաժորային իրավիճակում:

Հիշեցնենք, որ կառավարությունն այդ հատվածի շտկման համար արդեն երկրորդ լրացուցիչ գումարն է հատկացնում, բայց Գնել Սանոսյանը տեղեկացրեց, որ առաջիկա նիստերից մեկում  էլի է հատկացում լինելու և չբացառեց, որ այդքանից հետո էլ ընթացքում խնդիրներ առաջանան, որոնք կշտկվեն: