![](https://panorama.am/news_images/907/2718662_1/fk.thumb.jpg)
Արեն Դեյիրմենջյանը՝ Հայաստանում AMAA-ի նոր ներկայացուցիչ
AMAA-ի գործադիր տնօրեն Զավեն Խանջյանը հայտարարել է Արեն Դեյիրմենջյանին Հայաստանում AMAA-ի նոր ներկայացուցիչ նշանակելու մասին, որն ուժի մեջ կմտնի 2022 թ. սեպտեմբերի 1-ից:
AMAA-ից մանրամասնում են՝ Արեն Դեյիրմենջյանը երեք տարի առաջ տեղափոխվել է իր ծննդավայր Բեյրութից՝ միանալու Բաղրամյան պողոտայի վրա գտնվող Երևանի գլխամասային գրասենյակին՝ որպես Հայաստանում AMAA-ի ներկայացուցչի տեղակալ:
Արենի՝ հավատքով անցած անձնական ուղին, ինչպես ինքն է ասում, նրան տարավ «արթնության ճանապարհով», ինչը մղեց Արենին՝ թողնել իր տան հարմարավետությունը և ուղևորվել դեպի անհայտություն՝ ճշմարիտ իմաստ և նպատակ գտնելու համար:
2013 թ. Բեյրութի Ամերիկյան համալսարանն ավարտելուց հետո ստանալով լանդշաֆտային ճարտարապետության բակալավրի աստիճան՝ Արենը միացավ Լիբանանում իր ընտանիքի արտադրական բիզնեսին: Նա խորապես ներգրավված է եղել նաև Աշրաֆիեի Հայ Ավետարանական եկեղեցում՝ որպես երիտասարդական խմբի գլխավոր առաջնորդ և քրիստոնեական «Ջանից» ընկերակցության անդամ: 2016 թ. նա շարունակեց ուսումը Մոնտրյոյում (Շվեյցարիա), որն ավարտեց 2018 թ.՝ ստանալով մագիստրոսի աստիճան:
Մեկ տարի անց, երբ իրեն առաջարկվեց AMAA-ի Հայաստանի ներկայացուցչի տեղակալի պաշտոնը, Արենը մտածեց, որ ճիշտ ժամանակն է ընտանիքին պատկանող արտադրական ընկերությունից դուրս գալ և իր ղեկավարման փորձառությունն ու հոգևոր աճը ծառայեցնել բարեգործական և քրիստոնեական առաքելության իրագործմանը։
Որպես Հայաստանում AMAA-ի ներկայացուցչի տեղակալ՝ Արենի ամենօրյա պարտականությունների մի մասը ներառում էր շինարարական նախագծերի վերահսկումը, ֆինանսական թիմի հետ կապը, բյուջեի և դրամաշնորհային առաջարկների պատրաստումը:
Արենը նաև պարբերաբար այցելում էր AMAA-ի տարբեր գրասենյակներ Հայաստանում և Արցախում՝ ավելին իմանալու յուրաքանչյուր տարածաշրջանի համայնքների կարիքների մասին: Նա սերտորեն համագործակցել է AMAA-ի Հայաստանի ներկայացուցիչ Հարութ Ներսեսսյանի հետ՝ ռազմավարությունները նախանշելու, ինչպես նաև շահագրգիռ կողմերի հետ ընթացիկ և նախկին ծրագրերը գնահատելու համար:
Արենը երաժիշտ է, ստացել է դասական և ջազ դաշնամուրի գիտական աստիճան և նվագել է «Նոր երգ» քրիստոնեական նվագախմբում։ Ազատ ժամանակն անցկացնում է՝ դաշնամուր նվագելով, վայելելով Հայաստանի հարուստ երաժշտական աշխարհը, ճամփորդելով, մարզվելով, ընթերցելով և համտեսելով տարատեսակ խոհանոցների ուտեստներ:
Նրա ծառայության մղիչ ուժը մնում է հնազանդությամբ ջանալ՝ իրագործելու այն, ինչ Աստված դրել է իր առջև:
«Ես խանդավառ եմ Արեն Դեյիրմենջյանի՝ Հայաստանում AMAA-ի ներկայացուցիչ նշանակմամբ: Արենը նվիրվածություն է ցուցաբերել և մեծ եռանդով աշխատել է՝ Հայաստանում AMAA-ի առաքելության առաջխաղացման համար».-նշում է AMAA-ի գործադիր տնօրեն Զավեն Խանջյանը: «Մենք համոզված ենք, որ նրա ղեկավարման փորձը և հոգևոր հասունությունը կնպաստեն AMAA-ի գործունեության առաջխաղացմանը Հայաստանում և Արցախում»:
Լրահոս
Տեսանյութեր
![Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան](https://panorama.am/video_images/17/50811_1/mela_6760_thumb_v1_thumb_v1_thumb.thumb.jpg)
Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան