Ձեր վստահելի աղբյուրը

Արտակարգ իրավիճակների նախարար Արմեն Փամբուխչյանն այսօր լրագրողների հետ զրույցում հայտնեց, որ «Սուրմալու» առևտրի կենտրոնում hրդեհաշիջման աշխատանքներ չեն կատարվում, քանի որ հրդեհ չկա։

Նրա խոսքով՝ միայն հովացման աշխատանքներ են իրականացվում, քանի որ ինչքան մաքրում են փլատակները, այնքան փոքր օջախներ են բռնկվում՝ ծխի տեսքով։

«Ամբողջ ծավալով իրականացնում ենք միմիայն որոնողափրկարարական աշխատանքներ»,- ասաց ԱԻ նախարարը։

Արմեն Փամբուխչյանի խոսքով՝ քանի դեռ կա հավանականություն, որ փլատակներից կարող են քաղաքացու հայտնաբերել, ծանր տեխնիկա միանգամից չեն օգտագործում։ «Հնարավորինս բացազատում ենք տարածքը, հետո ծանր տեխնիկա օգտագործելուց առաջ, մեր փրկարարներից մարդ է լինում տվյալ հատվածում, դիտարկում է իրականացնում և նոր ծանր տեխնիկան օգտագործվում է»,- ընդգծեց նա։

Լրագրողները նաև հետաքրքրվեցին, թե արդյոք հանդիպել են «Սուրմալու» առևտրի կենտրոնի սեփականատիրոջ հետ, դեպքի վայրո՞ւմ է, նախարարը նշեց, որ հանդիպել են սեփականատերերի հետ։ «Այսօր էլ որոշակի հատակագծեր ենք ուզել Կադաստրի կոմիտեից, որպեսզի նկուղային հարկերում եթե կան այնպիսի տեղեր, որոնք մեզ համար տեսանելի չեն, ունենանք նաև այդ հատակագծերը։ Նկուղային հատվածներում տարածքը բացազատված է, մենք կկարողանանք ավելի մանրակրկիտ որոնողափրկարարական աշխատանքներ իրականացնել»,- ասաց Արմեն Փամբուխչյանը։