Ձեր վստահելի աղբյուրը

Լոնդոնի քաղաքապետ Սադիկ Խանը հայտարարել է, որ այս ձմռանը միլիոնավոր բրիտանացիներ չեն կարող իրենց թույլ տալ ոչ սնունդ գնել, ոչ էլ ջեռուցում ունենալ, եթե Կառավարությունը միջոցներ չձեռնարկի, գրում է «Ռիա Նովոստի» գործակալությունը։

«Մենք երբեք նման բան չենք տեսել, մեզ սպասում է մի ձմեռ, երբ միլիոնավոր մարդիկ ստիպված չեն լինի ընտրություն կատարել ջեռուցման և սննդի միջև, և, ցավոք, չեն կարողանա իրենց թույլ տալ ոչ մեկը, ոչ մյուսը: Դա չպետք է տեղի ունենա, կառավարությունը պետք է միջամտի, որպեսզի մարդիկ կարողանան բավարարել իրենց հիմնական կարիքները»,- գրել է նա Twitter-ի իր էջում՝ կցելով Bloomberg գործակալության վիճակագրությունը, ըստ որի՝ Մեծ Բրիտանիայում էլեկտրաէներգիայի միջին վճարը կարող է գերազանցել պատմական մակարդակը։

Օրեր առաջ էլ Լոնդոնի քաղաքապետը նախազգուշացրել էր մայրաքաղաքում հանցավորության պոտենցիալ աճի մասին՝ Մեծ Բրիտանիայի կյանքի ծախսերի ավելացման ֆոնին։

Ուկրաինայում Ռուսաստանի Դաշնության հատուկ գործողության մեկնարկից հետո Արևմուտքը մեծացրել է պատժամիջոցների ճնշումը Ռուսաստանի վրա։ Մատակարարման շղթաների խաթարումը բարձրացրել է վառելիքի, էլեկտրաէներգիայի և սննդամթերքի գները Եվրոպայում և ԱՄՆ-ում: Մեծ Բրիտանիայում ապրելու ծախսերի աճը հարվածել է միլիոնավոր տնային տնտեսությունների:

Անգլիայի բանկի կանխատեսումների համաձայն՝ այս տարվա չորրորդ եռամսյակից Մեծ Բրիտանիայի տնտեսությունը կհայտնվի ռեցեսիայի մեջ։

Ի դեպ նման կանխատեսում է արվել նաև Գերմանիայի տնտեսության համար։